இத்தலம் நடுநாட்டிலுள்ளது.

சுவாமிபெயர் - அருணாசலேசுவரர்.
தேவியார் - உண்ணாமுலையம்மை.

1112

பட்டி ஏறுகந் தேறிப் பலவி(ல்)லம் இட்ட மாக இரந்துண் டுழிதரும் அட்ட மூர்த்தியண் ணாமலை கைதொழக் கெட்டுப் போம்வினை கேடில்லை காண்மினே.

5.005.1

அடங்காத ஏற்றினை அடக்கி விடையாக் கொண்டு உகந்து ஏறிப் பல மனைகள் தோறும் விருப்பத்தோடு சென்று இரந்து உண்டு அலைந்து சுழலும், அட்டமூர்த்தியின் திருவுருவாகிய திருஅண்ணாமலையைக் கைகளால் தொழ வினைகள் கெட்டு ஒழியும்; என்றும் கேடு இல்லை; காண்பீராக.

1113

பெற்ற மேறுவர் பெய்பலிக் கென்றவர் சுற்ற மாமிகு தொல்புக ழாளொடும் அற்றந் தீர்க்குமண் ணாமலை கைதொழ நற்ற வத்தொடு ஞானத் திருப்பரே.

5.005.2

மனைகளிலிடும் பலிக்கெனப் பெற்றம் ஏறும் பெருமான், தனக்குச் சுற்றமாமெனும் உமையம்மையோடும் வருவார். துயர்தீர்க்கும் திருவண்ணாமலையைக் கைதொழுவார். நல்ல தவத்தோடு ஞானநெறியில் பிறழாது இருக்கப்பெறுவர்.

1114

பல்லி லோடுகை யேந்திப் பலவி(ல்)லம் ஒல்லை சென்றுணங் கல்கவர் வாரவர் அல்லல் தீர்க்குமண் ணாமலை கைதொழ நல்ல வாயின நம்மை யடையுமே.

5.005.3

பல்லில்லாத மண்டை யோட்டைக் கையில் ஏந்திப் பல மனைகளுக்கும் விரைந்து சென்று பெண்டிர் இடும் உணங்கிய சோற்றை அவர்தம் உள்ளங்களோடு கவர்வாராகிய சிவபிரானுடைய அடியார் அல்லல்களைத் தீர்க்கும் திருவண்ணாமலையைக் கைகளாற்றொழ, நல்லவாயின யாவும் நம்மைத் தாமே வந்தடையும்.

1115

பாடிச் சென்று பலிக்கென்று நின்றவர் ஓடிப் போயினர் செய்வதொன் றென்கொலோ ஆடிப் பாடியண் ணாமலை கைதொழ ஓடிப் போகும்நம் மேலை வினைகளே.

5.005.4

பாடிச்சென்று பலிக்கென்று நின்ற பெருமான் ஓடிப்போய்விட்டனராதலால் செய்வது இனி என்னை? ஆடியும் பாடியும் திருவண்ணாமலையைக் கைகளாற்றொழ நம் மேலை (பழைய) வினைகள் ஓடிப்போகும். (`ஓடிப் போயினர் செய்வதொன்றென்கொலோழு எனப் பேசநின்ற பெருமானது திருவண்ணாமலை - என இசையெச்சம் கொண்டு முடிக்க)

1116

தேடிச் சென்று திருந்தடி யேத்துமின் நாடி வந்தவர் நம்மையு மாட்கொள்வர் ஆடிப் பாடியண் ணாமலை கைதொழ ஓடிப் போம்நம துள்ள வினைகளே.

5.005.5

தேடிச்சென்று அப்பெருமான் திருவடிகளை ஏத்து வீராக; அங்ஙனம் தேடிச்செல்லும் நம்மை அவரும் நாடிவந்து ஆட்கொள்வர்; ஆடியும் பாடியும் திருவண்ணாமலையைக் கைதொழுதால் நமது நிகழ்வினைகள் ஓடிப்போகும்.

1117

கட்டி யொக்குங் கரும்பி னிடைத்துணி வெட்டி வீணைகள் பாடும் விகிர்தனார் அட்ட மூர்த்தியண் ணாமலை மேவிய நட்ட மாடியை நண்ணநன் காகுமே.

5.005.6

கரும்பினிடைக் கட்டி ஒக்குமாறு துணித்தும் வெட்டியும் வீணை வகைகளோடு பாடும் விகிர்தனாகிய அட்ட மூர்த்தியும் திருவண்ணாமலை மேவிய நட்டமாடும் பெருமானுமாகிய இறைவனை நண்ணினால் நன்றே ஆகும்.

1118

கோணிக் கொண்டையர் வேடமுன் கொண்டவர் பாணி நட்டங்க ளாடும் பரமனார் ஆணிப் பொன்னனண் ணாமலை கைதொழப் பேணி நின்ற பெருவினை போகுமே.

5.005.7

சேர்த்துக் கட்டிய கொண்டையரும், வேடம் முன்கொண்டவரும் தாளத்திற்கேற்ப நட்டங்கள் ஆடுபவரும் ஆணிப் பொன் போன்றவரும் ஆகிய பரமனார் திருவண்ணாமலையைக் கைகளால் தொழுதால் நம்மிடம் வருதற்குப் பேணி நின்ற பெருவினைகள் போகும்.

1119

கண்டந் தான்கறுத் தான்கால னாருயிர் பண்டு கால்கொடு பாய்ந்த பரமனார் அண்டத் தோங்குமண் ணாமலை கைதொழ விண்டு போகுநம் மேலை வினைகளே.

5.005.8

திருநீலகண்டரும், கூற்றுவன் உயிரைப் பண்டு கால் கொண்டு பாய்ந்த பரமனாரும் ஆகிய பெருமானுக்குரிய அண்டமுற ஓங்கி நிமிர்ந்த திருவண்ணாமலையைக் கைகளாற்றொழுதால் நம் மேலை (பழைய) வினைகள் நம்மைவிட்டு நீங்கும்.

1120

முந்திச் சென்றுமுப் போதும் வணங்குமின் அந்தி வாயொளி யான்றனண் ணாமலை சிந்தி யாவெழு வார்வினை தீர்த்திடும் கந்த மாமலர் சூடுங் கருத்தனே.

5.005.9

முந்துறச்சென்று, மாலைச்செவ்வானன்ன மேனி உடையானுடைய திருவண்ணாமலையை மூன்று பொழுதும் வணங்குவீர்களாக; அத்திருவண்ணாமலையைச் சிந்தித்தபடி துயிலெழுவார் வினைகளை, நறுமணமுடைய மலர்களைச் சூடும் தலைவனாகிய பெருமான் தீர்ப்பான்.

1121

மறையி னானொடு மாலவன் காண்கிலா நிறையு நீர்மையுள் நின்றருள் செய்தவன் உறையும் மாண்பினண் ணாமலை கைதொழப் பறையும் நாஞ்செய்த பாவங்க ளாகவே.

5.005.10

பிரமனும் திருமாலும் காண்கிலாதவனும், எங்கும் நிறைகின்ற தன்மையுள் நின்று அருள் செய்தவனுமாகிய பெருமான் உறையும் மாண்பினை உடைய திருவண்ணாமலையைக் கைகளாற்றொழுதால் நாம் செய்த பாவங்கள் எல்லாம் கெடும்.