நெஞ்சம் நினைப்பினும் நெற்பொரியும் நீளத்தம் அஞ்சல் எனஆற்றின் அஞ்சிற்றால் - அஞ்சப் புடைநெடும் காதுறப் போழ்ந்தகன்று நீண்ட படைநெடுங்கண் கொண்ட பனி.

76

என்னெஞ்சமே! இவளை ஆற்றுவிக்குஞ் சில சொற்களைச் சொல்ல நினைக்கின்றாயாயின், இவணோ தான் நெற்பொரியும் நீளத்தத்தைச் சொல்ல நினைப்பதற்கு முன்னே பிரிவினை யஞ்சிற்றால்; புடைநெடுங் காதுறப் போழ்ந்தகன்று நீண்ட படை நெடுங்கண்களும் பிரிவினை யஞ்சிப் பனி கொண்டன: ஆதலான் நமக் கிவளைப் பிரியமுடியாது.

வந்தால்தான் செல்லாமோ வாரிடையாய்! வார்கதிரால் வெந்தாற்போல் தோன்றும்நீள் வேய்அத்தம் - தந்தார் தகரக் குழல்புரளத் தாழ்துகில்கை யேந்தி மகரக் குழைமறித்த நோக்கு?

77

கொண்டணிந்து நிறையப்பட்ட தகரத்தையுடைய குழல்கள் அசையத் தாழ்ந்து துகிலைக் கையானே ஏந்தி மகரக்குழை மறித்த நோக்குடனே நீ வந்தால் யாம் போகோமோ? அரிய இடையினை யுடையாய்! நீஇரங்க வேண்டா.

ஒருகை, இருமருப்பின் மும்மதமால் யானை பருகுநீர் பைஞ்சுனையில் காணாது - அருகல் வழிவிலங்கி வீழும் வரைஅத்தம் சென்றார் அழிவிலர் ஆக அவர்!

78

ஒரு கையினையும் இருகோட்டினையும் மூன்று மதத்தினையும் உடைய மால் யானைகள் பருகு நீரைப் பைஞ்சுனையின்கட் காணாவாய் மருங்கே வழிவிலங்கித் தளர்ந்துவீழும் வரைகளையுடைய அத்தத்தைச் சென்ற அவர் அவ்வழிஇடையூறின்றி அழிவிலராக.

சென்றார் வருதல் செறிதொடி! சேய்த்தன்றால் நின்றார்சொல் தேறாதாய்! நீடின்றி - வென்றார் எடுத்த கொடியின் இலங்கருவி தோன்றும் கடுத்த மலைநாடு காண்!

79

நம்மைப் பிரிந்து போயினார் வருதல் செறி தொடி! சேய்த்தன்றால்; நின்மாட்டு நின்றொழுகுகின்றாருடைய சொற்களைத் தெரியாதாய்! போரின்கண் வென்றாரெடுத்த கொடிகள் போலத் தெளிந்திலங்கருவி தோன்றா நின்றது மிக்க மலை நாடு; ஆதலால், நீடின்றி இன்றே இரவின்கட் காண்பாயாக.

உருவேற் கண்ணாய்! ஒரு கால்தேர்ச் செல்வன் வெருவிவீந்து உக்கநீள் அத்தம் - வருவர் சிறந்து பொருள்தருவான் சேட்சென்றார் இன்றே இறந்துகண் ஆடும் இடம்.

80

அஞ்சத் தக்கவேல் போன்ற கண்களை யுடையாய்! ஒரு காலையுடைய தேர்ச் செல்வனாற் பிறர் கண்டார் வெருவும் வகை வீந்தவிந்த கானத்தானே முயற்சியாற் சிறந்து பொருடருவான் வேண்டிச் சென்றவர் இன்றே வருவர்; மிக்குக் கண் இடமாடா நின்றது.