'எங்கண் ஒன்று இல்லை; எமர் இல்லை' என்று, ஒருவர் தங்கண் அழிவு தாம் செய்யற்க!- எங்கானும் நன்கு திரண்டு பெரயவாம், ஆற்றவும் முன் கை நெடியார்க்குத் தோள்.

156

எம்மிடத்து ஒரு பொருளும் இல்லை எமக்கோ சுற்றத்தாருமில்லை என்று நினைத்து ஒருவர் தம்மிடத்துவரும் பெருமையை அழிக்கக் கூடியனவற்றைச் செய்யாதொழிக எங்கே பிறந்தவர்க்காயினும் மிகவும் முன்கை நீளமாக உடையவர்கட்கு தோள்கள் மிகவும் திரட்சியுற்றுப் பெரியனவா யிருக்கும்.

கருத்து: பெருமையை அழித்தற் குரியனவற்றைத் தாம் செய்யாதிருக்கவேண்டும். அதனால் மிக்க புகழ்உண்டாகும்.

நிலத்தின் மிகை ஆம் பெருஞ் செல்வம் வேண்டி, நலத்தகு வேந்தருள் நல்லாரைச் சார்ந்து, நிலத்து நிலைகொள்ளாக் காலரே காணின், உலக்கைமேல் காக்கை என்பார்.

157

நிலத்தின்கண் வாழ்வதற்கு மிகுதியாகிய பெரிய செல்வத்தை விரும்பி நன்மை மிகுந்த அரசர்களுள் நல்லோர் ஒருவரை அடைந்து (அங்குத் தங்கியிராமல்) நிலத்து நிலைகொள்ளா காலர் - ஓரிடத்தும் தங்குதலைக் கொள்ளாத கால்களை உடையவர்கள் ஆராயுமிடத்து உலக்கை மேலுள்ள காக்கைஎன்று கூறப்படுவார்கள்.

கருத்து: அறிவிலார் ஒருவரிடத்திலும் ஒரு தொழிலிலும் நிலைபெறாது வருதலால்நன்மையைப் பெறமாட்டார்கள்.

தலைக்கொண்ட தம் கருமம் தாம் மடிக்கொண்டு, கடைப்பிடி இல்லார்பால் வைத்து, கடைப்பிடி மிக்கு ஓடி விட்டுத் திரியின், அது பெரிது உக்கு ஓடிக் காட்டிவிடும்.

158

மேற்கொண்ட தமது செயலை தாம் சோம்பல் கொண்டு நடத்தி முடிக்கும் உறுதியைவிட்டு செருக்கில் மிகுந்து ஓடித்திரியின் தாம் மேற்கொண்ட அச்செயல் மிகவும் சிதைந்து தன்னைச் செய்வதாக மேற்கொண்டவனிடத்தில் தவ்வையைஅறிமுகப்படுத்தும்.

கருத்து:முயற்சி இல்லதானை மூதேவி அடைவாள்.

தம்மால் முடிவதனைத் தாம் ஆற்றிச் செய்கல்லார், 'பின்னை, ஒருவரால் செய்வித்தும்' என்று இருத்தல்,- செல் நீர் அருவி மலை நாட!-பாய்பவோ, வெந்நீரும் ஆடாதார் தீ.

159

பரந்து செல்கின்ற அருவியை உடைய மலைநாடனே! தம்மால் முடிக்கலான தொரு செயலை தாம்செய்து முடிக்கமாட்டாதவராய் பிறகு வேறொருவரால் செய்வித்துக் கொள்வோம் என்று சோம்பியிருத்தல் வெந்நீரினும் குளியாதார் தீயின்கண் பாய்வார்களோ? (இல்லை. அதுபோல அதுவுமில்லையாம்.)

கருத்து: தம்மால் முடியும் செயலைத் தாமேசெய்தல் வேண்டும்.

'முழுதுடன் முன்னே வகுத்தவன்' என்று, தொழுது இருந்தக் கண்ணே ஒழியுமோ, அல்லல்- இழுகினான் ஆகாப்பது இல்லையே, முன்னம் எழுதினான் ஓலை பழுது.

160

முழுதுலகத்தையும் முன்னே உண்டாக்கியவன் நமக்காக அல்லலையும் படைத்தான் என்று நினைத்து இஃது அவனாலேயே நீங்கும் போலுமென்று நினைத்து அவனையே தொழுதுகொண்டு முயற்சியின்றி யிருப்பின் துன்பம் நீங்குமோ? முன்னம் ஓலை பழுது எழுதினான் - முதலில் ஓலையைப் பழுதுபடஎழுதியவன் தாம் குற்றம் செய்தவனாக அறிந்தபின் செய்த குற்றத்தைப் பாதுகாப்பதில்லை. (உடனேநீக்குவன் என்பதாம்.)

கருத்து: துன்பம் தெய்வத்தால் வந்ததாயினும் அதனைநீக்க முயற்சி செய்க.