'எனக்குத் தகவு அன்றால்' என்பதே நோக்கி, தனக்குக் கரி ஆவான் தானாய், - தவற்றை நினைத்து, தன் கை குறைத்தான் தென்னவனும் காணார் எனச் செய்யார், மாணா வினை.

76

பாண்டியனும் எனக்குத் தகுதியன்று என்பதனை ஆராய்ந்து அறிந்து தனக்குச் சான்றாவான் தானேயாய் நின்று கதவையிடித்த குற்றத்தை நினைத்து தனது கையை வெட்டி வீழ்த்தினான். (ஆகையால்) அறிவுடையோர் பிறர் காண்டலிலர் என்பது கருதிச்செய்தலிலர் மாட்சிமைப்படாத செயலை.

கருத்து: அறிவுடையோர் பிறர் காணாமை கருதித் தீயசெயல்களைச் செய்யார்.

தீப் பால் வினையினைத் தீரவும் அஞ்சாராய்க் காப்பாரே போன்று உரைத்த பொய், குறளை,- ஏய்ப்பார் முன் சொல்லோடு ஒருப்படார், சோர்வு இன்றி மாறுபவே- வில்லொடு காக்கையே போன்று.

77

கொடிய செயல்களின்பாற்பட்ட வினைகளுக்கு மிகவும் அஞ்சாதவர்களாய் தம்மைக் காப்பாற்றுகின்றவர்களைப்போல் கூறிய பொய்யாலும் குறளையாலும் தம்மை ஏமாற்றுகின்றவர்கள் முன்பு அவர் கூறிய இனிய சொற்களுக்கு இணங்காதவர்களாய் வில்லைவிட்டு நீங்கும் காக்கையைப்போல தளர்ச்சியின்றி விட்டுநீங்குவார்கள்.

கருத்து:தீயார் சொற்களைக் கேட்டவுடனேயே அவர்களைவிட்டுநீங்குவர் நல்லோர்.

மடங்கிப் பசிப்பினும், மாண்புடை யாளர், தொடங்கிப் பிறர் உடைமை மேவார்-குடம்பை மடலொடு புள் கலாம் மால் கடல் சேர்ப்ப! கடலொடு காட்டு ஒட்டல் இல்.

78

கூடு பொருந்திய மடல்களோடு பறவைகள் விரவா நின்ற பெரிய கடலையுடைய நெய்தல்நிலத் தலைவனே! கடலோடு துரும்பு பொருந்துதல் இல்லை (அதுபோல) (தமது உடம்பு) ஒடுங்கும்படி பசித்தாராயினும் மாட்சிமை உடையார் பிறர் பொருளைத் தாம் கொள்ளத் தொடங்க விரும்பார்.

கருத்து: பெரியோர் பிறர் பொருளை விரும்பார்.

நிரை தொடி தாங்கிய நீள் தோள் மாற்கேயும், உரை ஒழியாவாகும்; உயர்ந்தோர்கண் குற்றம்,- மரையா கன்று ஊட்டும் மலை நாட!-மாயா; நரை ஆன் புறத்து இட்ட சூடு.

79

பெண் மான் தனது கன்றிற்குப் பால் அளிக்கும் மலைநாடனே! வரிசையாகத் தோள் வலயத்தைத் தாங்கிய நீண்ட தோளையுடைய திருமாலுக்கு பொருந்தியிருக்கும் குற்றங்கள் ஒருநாளும் விட்டு நீங்கா. (ஆதலால்) எல்லாவகையினுமுயர்ந்தாரிடத்துள்ள குற்றம் வெண்மையாகிய மாட்டின்மேல் இட்ட சூடுபோல் ஒருநாளும் மறையா.

கருத்து: பெரியோர்செய்த குற்றம் மறையாது.

கன்றி முதிர்ந்த கழியப் பல் நாள் செயினும், ஒன்றும், சிறியார்கண் என்றானும் - தோன்றாதாம் ஒன்றாய்விடினும், உயர்ந்தார்ப் படும் குற்றம்- குன்றின்மேல் இட்ட விளக்கு.

80

வெகுண்டு அளவுகடந்த தீயசெயல்களை மிகப்பல நாட்கள் செய்தாராயினும் அவற்றுள் ஒரு குற்றமும் சிறியாரிடத்து எப்பொழுதாயினும் தோன்றுதல் இல்லை உயர்ந்தோரிடத்துளதாகிய குற்றம் ஒன்றாக இருப்பினும் மலையின்மீது வைத்த விளக்கினைப்போல் என்றும் விளங்கித்தோன்றும்.

கருத்து: பெரியோர்கள் செய்த குற்றம் நன்றாக விளங்கித்தோன்றும்.