உளதுஇலது என்றலின் எனதுடல் என்றலின் ஐம்புலன் ஒடுக்கம் அறிதலின் கண்படின் உண்டிவினை இன்மையின் உணர்த்த உணர்தலின் மாயா இயந்திரத் தனுவினுள் ஆன்மா

என்பது சூத்திரம்.

வார்த்திகப் பொழிப்பு

கருத்துரை: என் நுதலிற்றோ வெனின், ஆன்மப் பிரகாசம் உணர்த்துதல் நுதலிற்று.


மேற்கோளும் ஏதுவும்: ஈண்டு , இலது என்றலின் ஆன்மா உளது என்றது.

பொழிப்புரை: எவற்றினையும் அன்று அன்று எனவிட்டு, ஆன்மா இலது என்று நிற்பது உளதாகலின் அதுவே அவ் வான்மாவாம் என்றது.

உதாரணம்:

அன்று அன்று எனநின்று அனைத்தும்விட்டு அஞ்செழுத்தாய் நின்றஒன்று உளதுஅதுவே நீ அனைத்தும்-- நின்றுஇன்று தர்ப்பணம்போல் காட்டலால் சார்மாயை நீயல்லை தற்பரமும் அல்லை தனி.

16

மேற்கோளும் ஏதுவும்: இனி, எனது உடல் என்றலின் ஆன்மா உளது என்றது

பொழிப்புரை: என்பதி என்மனை என்றாற்போல என்கை என்கால் என நிற்பது உளதாகலின் அதுவே அவ் வான்மாவாம் என்றது.

உதாரணம்:

எனதுஎன்ற மாட்டின் எனது அலாது என்னாது உனதலாது உன்கைகால் யாக்கை -- எனதென்றும் என்னறிவது என்றும் உரைத்துநீ நிற்றிகாண் உன்னில் அவை வேறாம் உணர்.

17

மேற்கோளும் ஏதுவும்: இனி, ஐம்புலன் அறிதலின் ஆன்மா உளது என்றது

பொழிப்புரை: ஐம்புலனாகிய சத்த பரிச ரூப ரச கந்தங்களை இந்திரியங்கள் ஒன்று அறிந்து ஒன்று அறியாமையின் இவ் ஐந்தினாலும் ஐம்பயனும் அறிவது உளதாகலின், அதுவே அவ் ஆன்மாவாம் என்றது.

உதாரணம்:

ஒன்று அறிந்தது ஒன்று அறியா தாகி உடல்மன்னி அன்றும் புலனாய அவ் அஞ்செழுத்தை-- ஒன்று அறிதல் உள்ளதே ஆகில் அதுநீ தனித்தனி கண்டு உள்ளல் அவை ஒன்றல்ல ஓர்.

18

மேற்கோளும் ஏதுவும்: இனி, ஒடுக்கம் அறிதலின் ஆன்மா உளது என்றது.

பொழிப்புரை: நனவின்கண் கனவு காண்டாம் என்றும் கண்டிலம் என்று நிற்பது உளதாகலின் அதுவே அவ்வான்மாவாம் என்றது.

உதாரணம்:

அவ்வுடலின் நின்றுயிர்ப்ப ஐம்பொறிகள் தாம்கிடப்பச் செவ்விதின் அவ்வுடலிற் சென்று அடங்கி-- அவ்வுடலின் வேறொன்று கொண்டு விளையாடி மீண்டு அதனை மாறல், உடல் நீ அல்லை மற்று

19

மேற்கோளும் ஏதுவும்: இனிக் கண்படில் உண்டிவினை இன்மையின் ஆன்மா உளது என்றது.

பொழிப்புரை: ஒடுங்கினவிடத்து இன்பத்துன்பஞ் சீவனம் பிரகிருத்திக்கு இன்மையின், ஒடுங்காதவிடத்து இன்பத்துன்பஞ் சீவியா நிற்பது உளதாகலின் அதுவே அவ்வான்மாவாம் என்றது.

உதாரணம்:

கண்டறியும் இவ்வுடலே காட்டு ஒடுங்கக் காணாதே உண்டிவினை இன்றி உயிர்த்தலால்-- கண்டறியும் உள்ளம்வேறு உண்டுஆய் ஒடுங்காது உடல்நண்ணில் உள்ளதாம் உண்டிவினை ஊன்.

20