முதன்மை பக்கம் » இலக்கியங்கள் » சைவ இலக்கியங்கள் » பன்னிரு திருமுறை » மூன்றாம் திருமுறை - தேவாரப் பதிகங்கள் » 3.040.தனித்திருவிருக்குக்குறள்
மூன்றாம் திருமுறை - தேவாரப் பதிகங்கள் - 3.040.தனித்திருவிருக்குக்குறள்
3.040.தனித்திருவிருக்குக்குறள்
பண் - கொல்லி
திருச்சிற்றம்பலம்
பண் - கொல்லி
திருச்சிற்றம்பலம்
3222 | கல்லானீழல், அல்லாத்தேவை நல்லார்பேணார், அல்லோநாமே |
3.040.1 |
கல்லால மரத்தின் நிழலில் சனகாதி முனிவர்கட்கு அறநெறி உரைத்தருளிய சிவபெருமானை அன்றிப் பிறிதொரு தெய்வத்தை மெய்யுணர்ந்த ஞானிகள் பொருளாகக் கொள்ளார். நாமும் அவ்வாறே சிவனையன்றி வேறு தெய்வத்தை வழிபடோம்.
3223 | கொன்றைசூடி, நின்றதேவை அன்றியொன்று, நன்றிலோமே |
3.040.2 |
கொன்றை மலரைச் சூடிவிளங்கும் சிவ பெருமானை அன்றி, பிறிதொரு தெய்வமும் முக்திச் செல்வம் தருவதாக நாம் கருதோம்.
3224 | கல்லாநெஞ்சின், நில்லானீசன் சொல்லாதாரோ, டல்லோநாமே |
3.040.3 |
இறைவனை இடைவிடாது தியானிக்காதவர் உள்ளத்தில் அவன் நில்லான். ஆதலால் அப்பெருமானின் பெருமைகளைப் போற்றாதவர்களோடு நாங்கள் சேரோம்.
3225 | கூற்றுதைத்த, நீற்றினானைப் போற்றுவார்கள், தோற்றினாரே |
3.040.4 |
மார்க்கண்டடேயரின் உயிரைக் கவரவந்த கூற்றுவனைத் தன் திருப்பாதத்தால் உதைத்த, தன் திருமேனியில் திருவெண்ணீற்றினைப் பூசியுள்ள சிவபெருமானைப் போற்றுபவர்களே பிறந்ததன் பயனை அடைவர்.
3226 | காட்டுளாடும், பாட்டுளானை நாட்டுளாரும், தேட்டுளாரே |
3.040.5 |
சுடுகாட்டில் நடனம் ஆடும் இறைவன் அடியாரேத்தும் பாமாலையை உடையவன். சிவபெருமானே முழுமுதற்கடவுள் என்று தம் உள்ளத்தில் நிலைநிறுத்தியவர்களே பேரின்பச் செல்வத்தில் திளைப்பவர்கள்.
3227 | தக்கன்வேள்விப், பொக்கந்தீர்த்த மிக்கதேவர், பக்கத்தோமே |
3.040.6 |
முழுமுதற்பொருளான சிவனை நினையாது தக்கன் செய்த வேள்வியின் குற்றத்தைத் தீர்த்த வல்லமையும், அருளுமுடைய சிவபெருமானுக்கு அணுக்கத் தொண்டராய் யாம் உள்ளோம்.
3228 | பெண்ணாணாய, விண்ணோர்கோவை நண்ணாதாரை, எண்ணோநாமே |
3.040.7 |
பெண்ணாகவும், ஆணாகவும் ஆகி தேவர்கள் போற்றும் தலைவரான சிவபெருமானை மனம், வாக்கு, காயம் ஆகிய திரிகரணங்களாலும் வழிபடாதவர்களை நாம் நெஞ்சாலும் நினைப்பதில்லை.
3229 | தூர்த்தன்வீரம், தீர்த்தகோவை ஆத்தமாக, ஏத்தினோமே |
3.040.8 |
துன்மதியால் கயிலையைப் பெயர்த்த இராவணனது வலிமையை அழித்து, பின் அவன் தன் தவறுணர்ந்து சாமகானம்பாடி இறைஞ்ச அவனுக்கு ஒளி பொருந்திய வாளும், நீண்ட வாழ்நாளும் அருளிய இறைவனை நாம் விரும்பிப் போற்றி வணங்கினோம்.
3230 | பூவினானும், தாவினானும் நாவினாலும், நோவினாரே |
3.040.9 |
தாமரைப் பூவின்மேல் வீற்றிருந்தருளும் பிரமனும் உலகத்தைத் தாவிஅளந்த திருமாலும், இறைவனின் திருமுடியையும், திருவடியையும் உடல்வருந்தித் தேடியும் காணாதவர்களாய்ப் பின்னர் நாவால் அவனைப் போற்றி உருகிநின்றனர்.
3231 | மொட்டமணர், கட்டர்தேரர் பிட்டர்சொல்லை, விட்டுளோமே |
3.040.10 |
தலைமயிரைப் பறித்து மொட்டைத் தலையுடன் விளங்கும் சமணர்களும், கட்டான உடலமைப்புடைய புத்தர்களும், சைவசமய நெறிக்குப் புறம்பாகக் கூறுவனவற்றை நாம் பொருளாகக் கொள்ளாது விட்டோம்.
3232 | அந்தண்காழிப், பந்தன்சொல்லைச் சிந்தைசெய்வோர், உய்த்துளோரே |
3.040.11 |
அழகிய குளிர்ச்சி பொருந்திய சீகாழியில் அவதரித்த ஞானசம்பந்தர் அருளிய இத்திருப்பதிகத்தைச் சிந்தனை செய்து பாடுபடுவர்கள் உய்தி பெற்றவர்களாவர்.
திருச்சிற்றம்பலம்
‹‹ முன்புறம் | 1 | 2 | ... | 38 | 39 | 40 | 41 | 42 | ... | 124 | 125 | தொடர்ச்சி ›› |
தேடல் தொடர்பான தகவல்கள்:
தனித்திருவிருக்குக்குறள் - மூன்றாம் திருமுறை - தேவாரப் பதிகங்கள் - Panniru Thirumurai - பன்னிரு திருமுறை - Shaiva Literature's - சைவ இலக்கியங்கள் - உள்ளத்தில், இறைவனை, பொருந்திய, அருளிய, போற்றி, பொருளாகக், தெய்வத்தை, திருமுறை, திருச்சிற்றம்பலம், சிவபெருமானை, பிறிதொரு, தனித்திருவிருக்குக்குறள்