பெருங்கடற் கரையது சிறுவெண் காக்கை களிற்றுச்செவி யன்ன பாசடை மயக்கிப் பனிக்கழி துழவும் பானாள் தனித்தோர் தேர்வந்து பெயர்ந்த தென்ப வதற்கொண் டோரு மலைக்கு மன்னை பிறரும்	5
பின்னுவிடு கதுப்பின் மின்னிழை மகளிர் இளையரு மடவரும் உளரே அலையாத் தாயரொடு நற்பா லோரே.
- கபிலர்.

தோழி! பெரிய கடற்கரையின்கண் உள்ளதாகிய சிறிய வெண்மையை உடைய காக்கை களிற்றினது காதைப் போன்ற பசிய இலையைக் கலக்கி குளிர்ச்சியை உடைய கழி நீரை இரையின் பொருட்டுத் துழாவுகின்ற பாதி இரவில் தனியாக ஒருதேர் இங்கே வந்து மீண்டு சென்றதென்று அயலார் கூறுவர்; அது தொடங்கி தாய் என்னைத் துன்புறுத்துகின்றாள்; பின்னல் நாலவிடப்பட்ட கூந்தலை உடைய மின்னுகின்ற ஆபரணத்தை அணிந்த மகளிருள் இளமை உடையோரும்; முடையோருமாகிய பிறரும! இருக்கின்றனர் அவர் தம்மை வருத்துதல் இல்லாத தாய்மாரோடு நல் வினையுடையர்.

முடிபு: தேர் வந்து பெயர்ந்ததென்ப; அன்னை அலைக்கும்; மகளிர் இளையரும் மடவரும் பிறரும் உளர்; அவர் நற்பாலோர்.    

கருத்து: இப்பொழுது காப்பு மிக்கதாதலின், தலைவன் என்னை வரைந்து கொள்வதே நலம்.