¹ மற்றெல்லாரையும் போலவே நானும் சாகக்கூடிய மனிதன் தான்@ மண்ணால் உண்டாக்கப்பட்ட முதல் மனிதனின் வழிவந்தவன் தான்@ தாய் வயிற்றிலேயே என் உடலும் உருவாயிற்று.

² புணர்ச்சி இன்பத்திலும் ஆணொருவனின் வித்தாலும் கருவாகி, இரத்தம் உறைந்து பத்து மாதங்களில் நான் உருவானேன்.

³ நான் பிறந்ததும் எல்லாரையும் போல் மூச்சு விட்டேன், அவர்களைப் போலவே நானும் நிலத்தில் கிடந்தேன், பிள்ளைகள் எல்லாம் அழுவது போல முதலில் நானுந்தான் அழுதேன்.

⁴ துணிகளால் போர்த்தி அக்கறையோடு என்னை வளர்த்தார்கள்@

⁵ அரசர்களுள் எவரும் வேறு வகையில் வாழ்வைத் தொடங்கவில்லை.

⁶ பிறப்பொக்கும் எல்லா உயிர்க்கும், இறப்பும் அனைவர்க்கும் ஒரு தன்மைத்தே.

⁷ ஆகையால் நான் மன்றாடிக் கேட்டேன், எனக்கு அறிவு வழங்கப்பட்டது@ கடவுளிடம் வேண்டிக் கொண்டேன், ஞான உணர்வு எனக்குக் கிடைத்தது@

⁸ செங்கோல்கள், அரியணைகளினும் மேலாக அதை மதித்தேன், அதனோடு ஒப்பிட்டால் செல்வப் பெருக்கு ஒன்றுமேயில்லை எனக் கருதினேன்.

⁹ விலையுயர்ந்த மாணிக்கத்தையும் நான் அதற்கு ஒப்பிடவில்லை@ ஏனெனில் பொன்னெல்லாம் அதன் முன் சிறு மணல் தான்@ வெள்ளியும் அதனோடு ஒப்பிட்டால் களிமண் தான்.

¹⁰ உடல் நலம், அழகு இவற்றினும் மிகுதியாய் அதன் மேல் அன்பு கொண்டேன், ஒளியை விட அதுவே சிறந்ததென்று தேர்ந்து கொண்டேன், ஏனெனில் அதனுடைய சுடர் என்றென்றைக்கும் குன்றாது.

¹¹ அதனுடன் எனக்கு எல்லா நன்மைகளும் கிடைத்தன, அதன் கையால் அளவற்ற செல்வம் உண்டாயிற்று.

¹² அவற்றையெல்லாம் நான் துய்த்து இன்பம் கண்டேன், ஏனெனில் ஞானமே அவற்றை நடத்தி வந்தது, ஆயினும் அதுவே அவற்றின் தாய் என்பதை அறியாதிருந்தேன்.

¹³ கபடின்றி நான் அதைக் கற்றேன், தாராளமாய்ப் பிறருக்கு வழங்குகிறேன்@ அதனால் உண்டாகும் நன்மைகளை நான் மறைக்கிறதில்லை.

¹⁴ ஞானம் மனிதர்க்குக் குன்றாத கருவூலம்@ அதைப் பெறுகிறவர்கள் கடவுளின் நட்பைப் பெறுவார்கள்@ ஏனெனில் அதன் படிப்பினையின் கொடைகளால் அவருக்கு உகந்தவர்களாகிறார்கள்.

¹⁵ அறிவுடைமைக்கேற்பப் பேசவும், பெற்றுக் கொண்ட வரங்களுக்கேற்பச் சிந்திக்கவும் கடவுள் எனக்கு அருள்புரிவாராக! ஞானத்திற்கும் அவர் தான் வழிகாட்டி@ ஞானிகளையும் அவரே திருத்துகிறவர்.

¹⁶ அறிவுத்திறன்கள் தொழிற்திறமைகள் அனைத்தும் போலவே, நாமும் நம் சொற்களும் அவர் கைகளில் தான் இருக்கிறோம்.

¹⁷ உலகில் உண்டானவற்றின் உண்மையான அறிவை எனக்குக் கொடுத்தவர் அவரே@ உலகின் அமைப்பையும், மூலப்பொருட்களின் ஆற்றலையும் நான் அறியச் செய்தவரும் அவரே.

¹⁸ காலத்தின் தொடக்கம், மையம், முடிவு முதலியவற்றையும், கதிரவனின் அண்மை சேய்மையால் உண்டாகும் மாற்றங்களையும், பருவகாலங்களின் மாறுபாடுகளையும்,

¹⁹ ஆண்டுகளின் ஓட்டத்தையும் விண்மீன்களின் கூட்டங்களையும்,

²⁰ விலங்கினத்தின் இயல்புகளையும், காட்டு மிருகங்களின் குணங்களையும், ஆவிகளின் வலிமையையும், மனிதரின் எண்ணங்களையும், செடி வகைகளையும், வேர்களின் பண்புகளையும் கற்பித்தவர் அவரே.

²¹ இன்னும் நான் மறைபொருளாய் இருக்கிறதையும் வெளிப்படையாய் இருக்கிறதையும் கற்றறிந்தேன்@ ஏனெனில் எல்லாவற்றையும் உருவாக்கிய ஞானமே எனக்குக் கற்றுத் கொடுத்தது.

²² ஞானத்தில் குடிகொண்டுள்ள ஆவி அறிவுடையது@ பரிசுத்தமானது, ஒரு தனித்தன்மைத்து, பல்வகை செயல்வன்மை வாய்ந்தது, நுண்மையானது@ இயக்குமாற்றல் வாய்ந்தது, தெளிவுமிக்கது, மாசுபடாதது@ திண்ணமானது, இனிமையானது, நன்மையை விரும்புவது@ கூர்மையானது, எதிர்க்க முடியாதது@

²³ நன்மை செய்வது, மனிதர் மேல் பரிவுள்ளது@ நிலைபெயராதது, அசையாதது, கவலையில்லாதது@ எல்லாம் வல்லது, எல்லாவற்றையும் பார்வையிடுவது@ அறிவும் தூய்மையும் நுண்மையும் கொண்ட எல்லா உள்ளங்களையும் ஊடுருவிச் செல்வது.

²⁴ ஞானம் அசைவுகளிலெல்லாம் மிக விரைவானது. அதன் தூய்மையின் காரணத்தால் எல்லாவற்றிலும் நிரம்பி நிற்கிறது, எல்லாவற்றையும் ஊடுருவிச் செல்கிறது.

²⁵ அது கடவுளுடைய வல்லமையின் ஆவி@ எல்லாம் வல்லவரது மகிமையொளியின் தூய சுடர்@ ஆதலால் மாசுள்ளது எதுவும் அதற்குள் நுழைய முடியாது.

²⁶ அது முடிவில்லா ஒளியின் எதிரொளி, கடவுளுடைய வேலைத்திறனின் கறை படியாக் கண்ணாடி@ அவருடைய நன்மைத் தனத்தின் சாயல்.

²⁷ அது தனித்து நிற்பினும், அனைத்தையும் செய்ய வல்லது@ தான் மாறாமல் நிலைத்திருந்து, அனைத்தையும் புதுப்பிக்கிறது@ ஒவ்வொரு தலைமுறையிலும் பரிசுத்த ஆன்மாக்களில் நுழைந்து, அவர்களைக் கடவுளின் நண்பர்களாகவும் இறைவாக்கினர்களாகவும் ஆக்குகிறது.

²⁸ ஞானத்தோடு வாழ்கிறவனுக்கு அன்பு செய்வதை விட வேறெவனுக்கும் கடவுள் மிகுதியாய் அன்பு செய்வதில்லை.

²⁹ ஏனெனில் ஞானம் கதிரவனை விட அழகுவாய்ந்தது, விண்மீன் கூட்டங்களை விடச் சிறப்பு மிக்கது, ஒளியோடு ஒப்பிட்டால் ஞானமே மேலானது.

³⁰ ஏனெனில் ஒளிக்குப் பின் இருள் சூழ்கிறது, ஆனால், தீமை ஒரு போதும் ஞானத்தை மேற்கொள்ளாது.