அம்ம வாழி தோழி காதலர் இன்னே கண்டுந் துறக்குவர் கொல்லோ முந்நாற் றிங்க ணிறைபொறுத் தசைஇ ஒதுங்கல் செல்லாப் பசும்புளி வேட்கைக் கடுஞ்சூல் மகளிர் போலநீர் கொண்டு	5
விசும்பிவர் கல்லாது தாங்குபு புணரிச் செழும்பல் குன்றம் நோக்கிப் பெருங்கலி வான மேர்தரும் பொழுதே.
- கச்சிப்பேட்டு நன்னாகையார்.

தோழி! கேட்பாயாக; பன்னிரண்டு மாதம் நிறைந்த கருப்பத்தைத் தாங்கித் தளர்ந்து நடக்க மாட்டாத பச்சைப் புளிச் சுவையில் விருப்பத்தை உடைய முதற் சூலை உடைய மகளிரைப் போல நீரை முகந்து கொண்டு வானத்தின் கண் ஏறாமல் அந்நீர்ப் பொறையைத் தாங்கிக் கொண்டு ஒன்றோடு ஒன்று சேர்ந்து வளம் மிக்க பல மலைகளை நோக்கி பெரிய முழக்கத்தை உடைய மேகங்கள் எழுகின்ற கார்ப் பருவத்தை இப்பொழுது பார்த்த பின்பும் தலைவர் நம்மைப் பிரிந்து வாராமல் இருப்பாரோ? வருவர்.

முடிபு: தோழி, காதலர் பொழுது கண்டும் துறக்குவர் கொல்லோ?     

கருத்து: கார்ப் பருவம் வந்தமையின் இனித் தலைவர் விரைவில் மீள்வர்.