திருச்செங்கோடு:

செங்குன்றுர் என்னும் பழைய பெயர் காலப்போக்கில் செங்கோடு - திருச்செங்கோடு என வழங்கப்பட்டு வருகிறது. சேலத்திலிருந்து 45 கி.மீ. தொலைவிலுள்ளது. திருச்செங்கோட்டில் நூற்பு ஆலைகள் அதிகம். இங்கு முதலியார் வகுப்பினர் அதிகமாக வாழ்கின்றனர். திருச்செங்கோடு மலை, சங்ககிரி இரயில் நிலையத்திலிருந்து 11 கி.மீ. தொலைவிலும், ஈரோட்டிலிருந்து 18 கி.மீ. தொலைவிலும் அமைந்துள்ளது. நாமக்கல்லிலிருந்து 32 கி.மீ. தொலைவுள்ளது. இம்மலை மீது ஏறிச் செல்வதற்குப் படிக்கட்டுப் பாதை அமைக்கப்பட்டுள்ளது. அப்படிக்கட்டுப் பாதையில்ஏறிச் செல்லும்போது கணக்கில்லாத குரங்குகள் துள்ளிக்குதித்து விளையாடுவதைக் காணலாம். இப்படிக் கட்டுப் பாதையில் இடையிடையே இளைப்பாறுவதற்காக மண்டபங்கள் அமைக்கப்பட்டுள்ளன. முதல் ஏற்றம் ஏறிச் சரிவில் இறங்கியதும் அடுத்துள்ள பாறையில் வெட்டப்பட்டுள்ள படிகளின் இருமருங்கும் பக்கத்துச்கொன்றாக இருபதடி உயரமான பாம்பின் உருவம் சிவலிங்கத்தை உடலில் தாங்கி, ஐந்து தலையாலும் குடைபிடித்துக் கொண்டு இருப்பது போன்று செதுக்கப்பட்டுள்ளது. உயர்ந்த மலைமீது ஏறிச்சென்றால் பல ஊற்றுக்கள் நீர் சுரந்து பள்ளத்தில் தேங்கி நிற்பதைக் காணலாம். இம்மலைமீது சிவபெருமான் மாதொருபாகனாக காட்சியளிக்கிறான். இக்கடவுள் வடமொழியில் அர்த்தநாரீஸ்வரன் என்று அழைக்கின்றனர்.

மலையின் மேல் திருக்கோயிலுக்குக் கீழ்ப்பாகத்தில் உள்ள சிகரத்திற்கு செல்லும்முன் உள்ள ஒரு குகை வடிவில் உள்ள பாறையிடுக்கு இருக்கிறது. அதையடுத்து உள்ளது குமர தீர்த்தம். திருச்செங்கோட்டு மலையின் பெயரே ஊருக்கும் அமைந்துள்ளது. ஊரின் நடுவில் உள்ள கைலாசநாதரை 'நல்ல தம்பிரான்' என்றும், மலைமேல் உள்ள அர்த்தநாரீசுவரரை 'மலைத் தம்பிரான்' என்றும் மக்கள் அழைக்கின்றனர். அம்மைக்கு தனிக் கோயில். கைலாசநாதர் கோயிலிலிருந்து அரை கி.மீ. தூரத்தில் மலையின் அடிவாரம் உள்ளது. மலைமீதுள்ள திருக்கோயில் ஐந்து நிலைகள் கொண்ட இராஜகோபுரத்துடன் அமைந்துள்ளது. கோபுரவாயிலை விட்டு இறங்கியதும் திருச்சந்நிதியில் திருக்காட்சியருளும் செங்கோட்டு வேலவர் திருவுருவம், சுமார் மூன்றரை அடி உயரம் கவரும். மலைமீதுள்ள கோயிலில் மூலவராக சிவலிங்கம் இல்லாமல் 'மாதொருபாகன்' இருப்பது இந்த தலத்தின் சிறப்பு.

கொங்கு நாட்டிலுள்ள ஏழு சிவத்தலங்களுள் இவ்வூரும் ஒன்று. தேவாரப் பாடல்பெற்றது. அருணகிரிநாதரால் 27 திருப்புகழுக்கு உரிய ஊர். தேவாரத்திலும், பெரிய புராணத்திலும் இவ்வூரை 'கொடிமாடச் செங்குன்றுர்' என்றே குறிப்பிடப்படுகிறது.

செங்குன்றுர்க் கிழார், உரிச்சொல் ஆசிரியர் காங்கேயர், கபிலதேவர், திருச்செங்கோட்டுப் புராண ஆசிரியர், கவிராய பண்டிதர் முத்துசாமிக் கோனார் முதலியோர் வாழ்ந்து சிறப்புப் பெற்றது திருச்செங்கோட்டுப்பதி.

இராசிபுரம்:

நெய், தயிருக்கு புகழ்பெற்றது. இங்கு கால்நடை வளர்ப்பு சிறப்பு. ஜவ்வரிசி தொழில் பெருகி வளர்ந்துள்ளது. இராசிபுரத்திலிருந்து சேந்தமங்கலம் வழியாக நாமக்கல் செல்லும் வழியில் பேளுக்குறிச்சி என்ற சிற்றுர் உள்ளது. அதனை அடுத்து கொல்லிமலைச் சாரலில் குன்றுதோறும் ஆடும் குமரனுக்கு கோயில் ஒன்று உள்ளது. அது பழனியப்பர் கோயில் என அழைக்கப்படுகிறது இக்கோயிலின் சிறப்பு. குமரக் கடவுள் நின்றுகொண்டு, கையில் தண்டத்துடனும், தலையில் அழகான கொண்டை காணப்படுகிறது. வேறு எங்கும் காணமுடியாத வடிவம் இது!

கொல்லி மலை:

நாமக்கல்லிலிருந்து 48 கி.மீ. தொலைவிலுள்ளது. இதன் உயரம் 1190 மீட்டர்களாகும். இம்மலையேற 70 கொண்டை ஊசி வளைவுகளை கடக்க வேண்டும். இம்மலையை சித்தர்கள் வாழும் 'சதுரகிரி' என சித்தர் இலக்கியங்கள் அழைக்கின்றன. இம்மலை மீது அறப்பளீஸ்வரர் கோயில் உள்ளது. இதையொட்டி 'அறப்பளீஸ்வரர் சதகம்' பாடப்பட்டுள்ளது. இங்குள்ள ஆகாசகங்கை அருவி 200 அடிமேலிருந்து விழுகிறது. மலைவாழ் மக்களான "பச்சைமலையாளி"கள் இங்கு வாழ்கின்றனர். அடர்ந்த காடுகள் உண்டு. சமவெளிகளில் பயிரிடுகின்றனர். தேனுக்கும், பலாவுக்கும் கொல்லிமலை புகழ் பெற்றது. அரசு ஆதரவில் இங்கு ஒரு மூலிகைத் தோட்டமும் நர்சரியும் நடத்தப்பட்டு வருகிறது. ஆண்டுதோறும் தமிழக சுற்றுளலாத் துறையால் இங்கு 'வல்வில் ஓரி' விழா கொண்டாடப்படுகிறது. இத்தகைய சிறப்புமிக்க கொல்லிமலை, கடல் மட்டத்திற்கு மேல் 4,500 அடிகள் உயரம் உடையது. 87 சதுர மைல் பரப்புடையது. சுமார் 260 கிராமங்களைக் கொண்டது. இக்கிராமங்கள் பல நாடுகளாகப் பிரிக்கப்பட்டுள்ளன. இம்மலைப் பகுதியில் வனவிலங்குகளை கரடிகளும், புலிகளும் வாழும் புதர்கள் உள்ளன. இங்குள்ள பள்ளத்தாக்குகள் நான்கு. அவை விவசாயத்திற்கு பயன்படத்தக்கவை.