¹ ஓசியாஸ் மகனான சீமோன் தலைமைக் குருவாக இருந்தவர். அவர் தமது வாழ்நாளில் ஆலயத்தைக் காப்பாற்றினார்@ தம் நாட்களில் கடவுளின் ஆலயத்தை உறுதிப்படுத்தினார்.

² கடவுளின் ஆலயத்தின் அடிப்படை அவரால் போடப்பட்டது. கடவுள் ஆலயத்தின் இரு பக்கத்துக் கட்டடங்களும், உயர்ந்த சுவர்களும் அவரால் கட்டப்பட்டன.

³ அவருடைய காலத்தில் தண்ணீர்க் கிணறுகள் கடலைப் போல் நிறைந்திருந்தன.

⁴ அவர் தம் மக்களைப் பாதுகாத்தார்@ அவர்களை அழிவினின்று காப்பாற்றினார்.

⁵ நகரத்தை விரிவுபடுத்துவதில் வல்லவரானார்@ மக்களிடம் பழகுவதில் மகிமை அடைந்தார்@ ஆலயத்தினுடையவும் மண்டபத்தினுடையவும் வழிகளை விரிவுபடுத்தினார்.

⁶ மேகத்தின் மத்தியில் விடிவெள்ளியைப் போலவும், காலத்தோடு வரும் முழு நிலவைப் போலவும் அவர் ஒளிர்ந்தார்.

⁷ மிகுந்த ஒளி வீசும் கதிரவனைப் போலக் கடவுளுடைய ஆலயத்தில் ஒளி வீசினார்.

⁸ மகிமையின் மேகங்களில் ஒளிரும் வில்லைப் போலவும், இளவேனிற் காலத்தில் ரோசாப் பூவைப் போலவும், தண்ணீர் ஓரத்தில் இருக்கும் லீலியைப் போலவும், கோடைக் காலத்தில் நறுமணம் தரும் தூபத்தைப் போலவும்,

⁹ சுவாலை விடும் நெருப்பைப் போலவும், நெருப்பில் எரியும் சாம்பிராணியைப் போலவும்,

¹⁰ கெட்டியாய்ச் செய்யப்பட்டு எல்லாவித விலையுயர்ந்த கற்களால் அணி செய்யப்பட்ட பொற்பாத்திரத்தைப் போலவும்,

¹¹ தளிர் விடும் ஒலிவ மரத்தைப் போலவும், உயரமாய் வளர்ந்திருக்கும் சிப்பிரேசைப் போலவும் அவர் மகிமையின் மேலாடையைத் தரித்துத் தமது மேலான பதவியின் அணிகலன்களை அணிந்து காணப்பட்டார்.

¹² அவர் புனித பீடத்தில் ஏறும் போது தமது புனித பணியின் உடைக்கு மகிமை தந்தார்@

¹³ பீடத்தின் பக்கத்தில் நின்று கொண்டு, குருக்கள் கையினின்று பலியின் பாகத்தைப் பெற்றுக் கொண்டார். அவர் நின்றது சகோதரருடைய மகுடத்தைப் போலும், அவரைச் சுற்றி அவர் சகோதரர் நின்றது லீபான் மலையில் கேதுரு மரங்களை நட்டது போலும் இருந்தது.

¹⁴ இவ்வண்ணமே, ஆரோனின் மக்கள் எல்லாரும் தங்கள் மகிமையில் பனையின் கிளைகளைப் போல் அவரைச் சுற்றி நின்றார்கள்.

¹⁵ இஸ்ராயேல் சபைக்கு முன்பாக ஆண்டவருடைய காணிக்கை அவர்களுடைய கையால் கொடுக்கப்பட்டது. பீடத்தில் பலியை முடிவுபெறச் செய்வதும், உன்னத அரசருடைய காணிக்கையை அதிகரிப்பதும் அவருடைய பணியாக இருந்தன.

¹⁶ அவர் பானப் பலியில் தம் கையை நீட்டிக் கொடிமுந்திரிப் பழச்சாற்றை ஒப்புக்கொடுத்தார்.

¹⁷ உன்னத கடவுளுக்குப் பீடத்தின் அடியில் தெய்வீக வாசனையைச் சிந்தினார்.

¹⁸ அப்போது ஆரோன் மக்கள் பேரொலியிட்டு, வெள்ளியினால் செய்யப்பட்ட எக்காளங்களை ஊதினார்கள்@ கடவுளுடைய முன்னிலையில் நினைவில் நிலைக்கும்படி பெரும் சத்தமிட்டார்கள்.

¹⁹ அப்போது எல்லா மக்களும் விரைவில் ஒன்று சேர்ந்து, தங்கள் ஆண்டவரான கடவுளை ஆராதிக்கவும், மேலான எல்லா வல்லமையுமுள்ள கடவுளை மன்றாடவும் பூமியில் முகங்குப்புற விழுந்தார்கள்.

²⁰ பாடகர்கள் தங்கள் குரலொலியை உயர்த்தினார்கள்@ கடவுளின் பெரிய ஆலயத்தில் இனிதான சத்தம் அதிகப்பட்டு நின்றது.

²¹ ஆண்டவருடைய மகிமை நிறைவாகிற வரைக்கும், தங்களுடைய காணிக்கையை நிறைவேற்றுகிற வரைக்கும் மக்கள் செபங்களில் உன்னத ஆண்டவரை மன்றாடினார்கள்.

²² அப்போது அவர் ( சீமோன் ) இறங்கி வந்து, கடவுளுக்குத் தம் உதடுகளால் மகிமை கொடுப்பதற்கும், அவர் பெயரால் தாம் மகிமைப்படுத்தப்படவும், இஸ்ராயேல் மக்களுடைய சபை முழுவதன் மேல் தம் கைகளை விரித்தார்.

²³ கடவுளுடைய வலிமையைக் காட்டவேண்டி, வேண்டுதலைத் திரும்பவும் செய்தார்.

²⁴ பூமியெங்கும் மகத்தான காரியங்களைச் செய்து, நம் தாயின் வயிற்றினின்று நம் நாட்களை அதிகரித்து, தமது இரக்கத்தின்படியே நம்மை நடத்தின எல்லாம் வல்ல கடவுளை நோக்கி இப்போது மன்றாடுங்கள்.

²⁵ இதய மகிழ்ச்சியை அவர் நமக்குக் கொடுப்பாராக@ நமது காலத்தில் இஸ்ராயேலில் என்றென்றைக்கும் சமாதானம் இருக்கும்படி செய்வாராக.

²⁶ நம்முடைய நாட்களில் நம்மைக் காப்பாற்றக் கடவுளின் இரக்கம் நம்முடன் இருக்கிறது என்று இஸ்ராயேல் விசுவசிக்கும்படி செய்வாராக.

²⁷ இருவிதக் குடிகளை என் ஆன்மா பகைக்கின்றது@ நான் பகைத்த மூன்றாம் விதக் குடியோ குடியன்று.

²⁸ அவர்கள் யாரென்றால், செயீர் மலையில் இருக்கிறவர்களும், பிலிஸ்தியரும், சிக்கேமில் வாழும் மூடத்தனமுள்ள மக்களுமாம்.

²⁹ தம் இதயத்தில் ஞானத்தைப் புதுப்பித்த யெருசலேம் வாசியான சீராக் மகன் இயேசு இந்நூலில் ஞானத்தினுடையவும் நன்னெறியினுடையவும் போதகத்தை எழுதினார்.

³⁰ இந்த நற்போதகங்களைக் கடைப்பிடிப்பவன் பேறு பெற்றவன். தன் இதயத்தில் அவைகளைக் காப்பாற்றுகிறவன் எப்போதைக்கும் ஞானியாய் இருப்பான்.

³¹ ஏனென்றால், அவன் அவைகளைச் செய்தால் அனைத்திற்கும் ஆற்றல் உள்ளவன் ஆவான். ஏனென்றால், கடவுளுடைய ஒளியே அவன் குறிப்பு அடையாளமாய் இருக்கின்றது.