முதலாம் மகேந்திரவர்மன் குடைவரைக் கோயில்களை அறிமுகப்படுத்தினார். இத்தகைய குடைவரைக் கோயில்களை தமிழ்நாட்டில் மண்டகப்பட்டு, மகேந்திரவாடி, மாமண்டூர், தளவானூர், திருச்சிராப்பள்ளி, வல்லம், சீயமங்கலம், திருக்கழுக்குன்றம் போன்ற இடங்களில் காணலாம்.

பல்லவக் கட்டிடக் கலையின் இரண்டாவது நிலையில், மாமல்லபுரத்தில் வடிக்கப்பட்டுள்ள ஒற்றைக் கல் ரதங்களையும் மண்டபங்களையும் கூறலாம். இந்த அற்புதமான கலைச் சின்னங்களை உருவாக்கிய பெருமை முதலாம் நரசிம்மவர்மனையே சாரும். பஞ்சபாண்டவ ரதங்கள் என்று அழைக்கப்படும் ஐந்து வெவ்வேறு கோயில் அமைப்புகளைக் கொண்ட ரதங்கள் அனைவரை யும் கவரக் கூடியவை. மண்டபங்களின் சுவர்களில் அழகான சிற்பங்கள் செதுக்கோவியங்களாக அமைக்கப் பட்டுள்ளன. மண்டபங்களில் சிறப்பானவை மகிஷாசுர மர்த்தினி மண்டபம், திருமூர்த்தி மண்டபம், வராஹ மண்டபம்.

அடுத்தபடியாக கட்டுமானக் கோயில்கள் எழுப்பப்பட்டன. தொடக்கத்தில் இவை மணற் பாறைக் கற்களைக் கொண்டு கட்டப்பட்டன. காஞ்சி கைலாசநாதர் ஆலயம், மாமல்லபுரம் கடற்கரைக் கோயில் தொடக்கால கட்டுமானக் கோயில்களுக்கு சிறந்த எடுத்துக் காட்டுகளாகும். பல்லவர் கலையின் சிறப்புக்கு சிகரமாகக் கருதப்படுவது காஞ்சி கைலாசநாதர் ஆலயமாகும்.

பல்லவர்காலக் கட்டிடக் கலையின் இறுதி நிலைக்கு எடுத்துக் காட்டாக பிற்காலப் பல்லவர்கள் அமைத்த கட்டுமானக் கோயில்களைக் கூறலாம். காஞ்சிபுரத்திலுள்ள வைகுந்த பெருமாள் ஆலயம், முக்தீஸ்வரர் ஆலயம், மதங்கீஸ்வரர் ஆலயம் ஆகியன குறிப்பிடத்தக்கவை.

சிற்பக் கலை வளர்ச்சிக்கும் பல்லவர்கள் அருந்தொண்டு ஆற்றியுள்ளனர். கோயில்களில் காணப்படும் அழகான சிற்பங்கள் தவிர மாமல்லபுரத்தில் வடிக்கப்பட்டுள்ள 'திறந்த வெளிக் கலைக் கூடம்' அற்புதமான சிற்பங்களைக் கொண்டுள்ளது. கங்கை வீழ்தல் அல்லது அர்ச்சுனன் தவம் என்ற அற்புத சிற்பக் காட்சி கல்லில் வடிக்கப்பட்ட ஓவியங்கள் என்று புகழப்படுகின்றன. இச்சிற்பங்கள் வெளிப்படுத்தும் நுண்ணிய கருத்துக்கள் வியப்புக்குரியவை. பேன் பார்க்கும் குரங்கு, யானைச்சிற்பங்கள், தவமியற்றும் பூனை போன்றவை சிற்பியின் திறமைக்கு சான்று பகர்கின்றன.

நுண்கலைகள்

இசை, நடனம், ஓவியம் போன்ற நுண்கலைகளையும் பல்லவர்கள் ஆதரித்தனர். மாமண்டூர் கல்வெட்டு இசைப் பண் குறித்து விளக்குகிறது. குடுமியான் மலை இசைக்கல்வெட்டு இசைப் பண்களையும், இசைக் கருவிகளையும் பற்றி குறிப்பிடுகிறது. ஆழ்வார்கள், நாயன்மார்கள் இயற்றிய பாடல்கள் பண்ணோடு இசைக்கப்படுவதற்காகவே உருவாக்கப்பட்டன. நடனமும், நாடகமும் இக்காலத்தில் வளர்ச்சியடைந்தன. இக்கால சிற்பங்கள் நடனக் கலையின் பல்வேறு வடிவங்களை வெளிப்படுத்துகின்றன. சித்தன்னவாசல் ஓவியங்கள் பல்லவர் காலத்தைச் சேர்ந்தவை. முதலாம் மகேந்திரவர்மன் காலத்தில் தட்சிண சித்திரம் என்ற ஒவியக்கலை விளக்கநூல் தொகுக்கப்பட்டது. அவனுக்கு சித்திரக்காரப்புலி என்ற விருதுப் பெயரும் இருந்தது குறிப்பிடத்தக்கது.

---