¹ அருளப்பன் காசாராவினின்று சென்று, மக்களுக்கு எதிராய்ச் செந்தேபேயுஸ் செய்த யாவற்றையும் தன் தந்தையாகிய சீமோனிடம் அறிவித்தான்.

² அப்போது சீமோன் தம் இரு மூத்த புதல்வியராகிய யூதாசையும் அருளப்பனையும் அழைத்து, அவர்களை நோக்கி: நானும் என் சகோதரரும் என் தந்தையின் குடும்பமும் எங்கள் இளமை முதல் இந்நாள் வரை இஸ்ராயேலின் பகைவர்களை எதிர்த்து வென்றோம். செய்த காரியங்கள் அனைத்திலும் வெற்றி கண்டு, பலமுறை இஸ்ராயேலைக் காப்பாற்றினோம்.

³ இப்போதோ நான் முதியவனாகி விட்டேன். ஆதலால் நீங்களும் என் சகோதரரும் எனக்குப் பதிலாய் இருந்து, நம் மக்களுக்காகச் சண்டை செய்யுங்கள். கடவுளும் உங்களுக்கு உதவியாய் இருப்பார் என்று கூறினார்.

⁴ நாட்டில் இருபதினாயிரம் வீரரையும் குதிரை வீரரையும் அவர்கள் தேர்ந்து கொண்டார்கள்@ செந்தேபேயுசை நோக்கிச் சென்றார்கள்@ மோதினில் இளைப்பாறினார்கள்.

⁵ காலையில் எழுந்து சமவெளியை அடைந்தார்கள், அவர்களை எதிர்த்துத் திரளான காலாட்களும், குதிரை வீரரும் வந்தார்கள். இரு படைகளுக்கும் நடுவே நதி ஒன்று இருந்தது.

⁶ அருளப்பனும் அவன் படைகளும் பகைவருக்கு முன்சென்றார்கள். தன் படைகள் நதியைக் கடக்க அஞ்சுவதைக் கண்டு, தானே முந்திக் கடந்தான். அவனைக் கண்டு அவன் படைகளும் அவனுக்குப்பிறகே நதியைக் கடந்தன.

⁷ அவன் மக்களையும், குதிரை வீரர்களையும் காலாட்களுக்கு நடுவில் இருக்கச் செய்தான்@ ஏனென்றால், பகைவரின் குதிரைப்படை திரளாய் இருந்தது.

⁸ அவன் புனித எக்காளங்களை ஒலிக்கச் செய்ய, செந்தேபேயுசும் அவன் படைகளும் ஓட்டம் பிடித்தார்கள். அவர்களில் பலர் காயப்பட்டு விழுந்தார்கள்@ மீதியாய் இருந்தவர்கள் கோட்டைக்குள் ஓடி ஒளிந்தார்கள்.

⁹ அப்போது அருளப்பனின் சகோதரன் யூதாஸ் காயமடைந்தான். அருளப்பனோவென்றால் தான் கட்டிய சேதிரோன் வருமட்டும் பகைவரைப் பின்தொடர்ந்தான்.

¹⁰ அவர்கள் அசோத்துஸ் சமவெளிகளில் இருந்த கோபுரங்கள் வரை ஓடினார்கள். அவன் அவைகளைத் தீக்கிரையாக்கினான். அவர்களில் இரண்டாயிரம் பேர் மாண்டார்கள். அருளப்பன் அமைதியாய் யூதேயா திரும்பினான்.

¹¹ யெரிக்கோ சமவெளியில் அபோபுஸ் புதல்வன் தோலெமேயுஸ் தலைவனாக இருந்தான். வெள்ளியும் பொன்னும் அவனிடம் ஏராளமாய் இருந்தன.

¹² ஏனென்றால், அவன் தலைமைக்குருவின் மருமகனாய் இருந்தான்.

¹³ ஆதலால் அவன் செருக்குற்று, நாடு முழுமைக்கும் தானே தலைவனாயிருக்க விரும்பினான்@ சீமோனையும் அவர் மக்களையும் கபடமாய் அகற்றி விட எண்ணினான்.

¹⁴ சீமோன் யூதேயா நாட்டின் நகரங்களைச் சுற்றி, அவைகளைப் பார்வையிட வந்த போது, நூற்றெழுபத்தேழாம் ஆண்டு சாபாத் என்ற பதினோராம் மாதம் தம் புதல்வர்களாகிய மத்தத்தியாஸ், யூதாஸ் இவர்களோடு யெரிக்கோவில் தங்கினார்.

¹⁵ அபோபுசின் புதல்வன் தான் கட்டியிருந்த தோக் என்னும் சிறு கோட்டைக்குள் அவர்களைக் கபடமாய் வர வேற்று, அவர்களுக்குப் பெரிய விருந்து செய்தான். ஆனால், அவ்விடத்தில் சிலரை ஒளித்து வைத்திருந்தான்.

¹⁶ சீமோனும் அவர் புதல்வரும் நன்கு உண்டு மயக்கம் கொண்டிருந்த போது தோலெமேயுஸ் தன்னைச் சேர்ந்தவர்களோடு எழுந்து, போர்க்கருவிகளோடு உணவறையினுள் புகுந்து, அவரையும் அவருடைய இரு புதல்வரையும் சில ஊழியர்களையும் கொன்றான்.

¹⁷ இவ்வாறு இஸ்ராயேலுக்குத் துரோகம் செய்து, நன்மைக்குத் தீமை செய்தான்.

¹⁸ தோலெமேயுஸ் இச்செய்திகளை அந்தியோக்கஸ் மன்னனுக்கு எழுதியனுப்பி, தனக்கு உதவியாகப் படைகளை அனுப்பவும், நாட்டையும் நகரங்களையும் கப்பங்களையும் தனக்குக் கொடுத்து விடவும் கேட்டுக் கொண்டான்.

¹⁹ அருளப்பனைக் கொல்வதற்காக வேறு சிலரைக் காசாராவுக்கு அனுப்பினான்@ படைத்தலைவர்கள் தன்னிடம் வந்து சேரும்படியாகவும், தான் வெள்ளியும் பொன்னும் வெகுமதிகளும் அளிப்பதாகவும் அவர்களுக்கு எழுதியனுப்பினான்.

²⁰ யெருசலேமையும், கடவுள் ஆலயம் இருந்த மலையையும் கைப்பற்றச் சிலரை அனுப்பினான்.

²¹ ஒருவன் காசாராவிலிருந்த அருளப்பனிடம் முன்னதாகவே ஓடிவந்து, அவன் தந்தையும் சகோதரரும் கொலையுண்டதை அறிவித்து: அவன் உம்மையும் கொலைசெய்ய ஆட்களை அனுப்பியிருக்கிறான் என்றான்.

²² அருளப்பன் இதைக் கேள்விப்பட்டுப் பெரிதும் திகிலடைந்தான்: தன்னைக் கொலை செய்ய வந்தவர்களைப் பிடித்துக் கொன்றான்@ ஏனென்றால், அவர்கள் தன்னைக் கொல்லத் தேடினார்களென்று அறிந்திருந்தான்.

²³ அருளப்பன் புரிந்த மற்றவைகளும் போர்களும் வீரச் செயல்களும் கட்டின கட்டடங்களும், செய்த யாவும்,

²⁴ அவன் தந்தைக்குப் பிறகு அவன் தலைமைக்குருவான நாள் முதல் அவன் அக்குருத்துவப் பணி ஆற்றிய நாட்களின் குறிப்புப் புத்தகத்தில் எழுதப்பட்டிருக்கின்றன.