¹ கடலின் தீவுகளினின்று தெமெத்திரியுஸ் புதல்வனான அந்தியோக்கஸ் மன்னன் யூத குலத்தின் தலைமைக்குருவும் தலைவருமான சீமோனுக்கும் எல்லா மக்களுக்கும் கடிதம் எழுதினான்.

² அதில் சொல்லப்பட்டவை என்னவென்றால்: தலைமைக்குரு சீமோனுக்கும் யூத குலத்தாருக்கும் அந்தியோக்கஸ் மன்னர் வாழ்த்துக் கூறுகிறோம்.

³ நம்முடைய முன்னோரின் நாட்டைச் சில தீயவர் கைப்பற்றிக் கொண்டபடியால், நாம் அதைத் திரும்பவும் பழைய நிலைக்குக் கொணரத் தீர்மானித்திருக்கிறோம். அதற்காகவே சிறந்த சேனையையும் போர்க் கப்பல்களையும் சேகரித்திருக்கிறோம்.

⁴ நம்முடைய நாட்டிற்குத் தீமை செய்தவர்களையும், நம் ஆட்சிக்குட்பட்ட பல நகரங்களையும், அழித்தவர்களையும் பழிவாங்குவதற்காக நாட்டினுள் புக மனம் கொண்டுள்ளோம்.

⁵ ஆதலால், நமக்கு முன்னிருந்த அரசர்கள் அனைவரும் உனக்கு விலக்கியிருந்த எல்லா வரிகளையும், உனக்கு வழங்கியிருந்த எல்லாக் கொடைகளையும் நாமும் இப்போது ஏற்றுக் கொள்கிறோம்.

⁶ உன் நாட்டில் உன் பெயரால் நாணயம் அடிக்க அனுமதி அளிக்கிறோம்.

⁷ யெருசலேம் நகர் புனிதமானதாகவும் சுதந்திரம் உள்ளதாகவுமிருக்கவும், செய்யப்பட்ட எல்லாப் போர்க் கருவிகளும், நீ கட்டி வாழ்ந்து வரும் கோட்டைகளும் உன் ஆளுகையின் கீழ் இருக்கவும் உத்தரவளிக்கிறோம்.

⁸ கடந்த காலத்துக்கும் வருங்காலத்திற்கும், இன்று முதல் எப்போதைக்கும் அரசருக்குக் கொடுக்கப்பட வேண்டிய கடன்களெல்லாம் உனக்கு மன்னிக்கப்பட்டன.

⁹ நமது நாட்டை நாம் அடைந்த பிறகு, உங்கள் பெயர் பூவுலகெங்கும் விளங்கும்படி, உன்னையும் உன் இனத்தாரையும் ஆலயத்தையும் பெரிதும் மாட்சிப்படுத்துவோம்.

¹⁰ நூற்றெழுபத்து நான்காம் ஆண்டு அந்தியோக்கஸ் தன் முன்னோரின் நாட்டினுள் புகுந்தான். எல்லாப் படைகளும் அவனைச் சேர்ந்து கொண்டன. ஆதலால், திரிபோனுடன் சிலர் மட்டுமே தங்கியிருந்தனர்.

¹¹ அந்தியோக்கஸ் மன்னன் அவனைப் பின் தொடரவே, அவன் கடலோரமாய் ஓடித் தோராவை அடைந்தான்.

¹² ஏனென்றால், தன் மேல் பழிகள் பல சுமத்தப்பட்டிருப்பதையும், தன் படைகள் தன்னை விட்டகன்றதையும், அறிந்திருந்தான்.

¹³ அந்தியோக்கஸ் நூற்றிருபதினாயிரம் படை வீரரோடும், எண்ணாயிரம் குதிரை வீரரோடும் தோரா நகரைத் தாக்கினான்.

¹⁴ நகரைச் சுற்றி வளைத்துக் கொண்டு, கப்பல்களும் அருகில் வரும்படி செய்தான்@ கடற்பக்கமும் தரைப்பக்கமும் நகரை நெருக்கி, எவனும் வெளியே போகாமலும் உள்ளே நுழையாமலும் செய்தான்.

¹⁵ அரசர்களுக்கும் பல இனத்தாருக்கும் எழுதப்பட்ட கடிதங்களோடு நுமேனியுசும் அவனுடன் இருந்தவர்களும் உரோமையினின்று திரும்பி வந்தார்கள்.

¹⁶ அவைகளில்: உரோமையருடைய தூதர் லூசியுஸ் தோலெமேயுஸ் மன்னனுக்கு வாழ்த்துகள்.

¹⁷ யூதருடைய தலைமைக்குருவான சீமோனாலும் யூத மக்களாலும் முன் செய்திருந்த சமாதான உடன்படிக்கையையும் நட்பையும் புதுப்பிக்கும்படி அனுப்பப்பட்ட எங்கள் நண்பரான யூத பிரதிநிதிகள் எங்களிடம் வந்தார்கள்.

¹⁸ அவர்கள் ஆயிரம் பொற்காசு நிறையுள்ள பொன்கேடயம் ஒன்று கொண்டு வந்தார்கள்.

¹⁹ ஆதலால், அவர்களுக்குத் தீங்கு செய்யாதபடிக்கும், அவர்களை எதிர்த்துப் போர்செய்கிறவர்களுக்கு உதவி செய்யாதபடிக்கும் அரசர்களுக்கும் நாடுகளுக்கும் எழுதுகிறோம்.

²⁰ அவர்கள் கொண்டு வந்த கேடயத்தைப் பெற்றுக்கொள்வது எங்களுக்கு நலமாகத் தோன்றியது.

²¹ ஆதலால், தீயவர் யாரேனும் அவர்கள் நாட்டினின்று உங்களிடம் ஓடி வந்து விடுவார்களேயானால், தங்கள் சட்டப்படி அவர்களைப் பழிவாங்கும்படியாகத் தலைமைக்குருவான சீமோனிடம் அவர்களை ஒப்புவித்து விடுங்கள் என்று எழுதியிருந்தது.

²² இவ்வாறே தெமெத்திரியுஸ் மன்னனுக்கும், அத்தாலுஸ், அரியார்த்துஸ், அர்சாக்கஸ் மன்னர்களுக்கும்,

²³ எல்லா நாடுகளுக்கும், லாம்சாக்கஸ், ஸ்பார்த்தியர், தேலோஸ், மிந்தோஸ், சீசியோன், காரியா, சாமோஸ், பாம்பீலியா, லீசியா, அலிக்கார்நாசுஸ், கோவோ, சீதெ, அராதுஸ், ரோதுஸ், பாசேலிதஸ், கார்த்தீனா, நீதுஸ், சீப்புருஸ், சிரேனே, முதலிய இனத்தாருக்கும் நாடுகளுக்கும் எழுதியிருந்தது.

²⁴ அவர்கள் இதன் நகலைத் தலைமைக்குரு சீமோனுக்கும் யூதமக்களுக்கும் அனுப்பினார்கள்.

²⁵ அந்தியோக்கஸ் மன்னன் திரும்பவும் தோரா நகரைத் தாக்கி, போரில் பலப் பொறிகளை பயன்படுத்தி எதிர்த்தான். திரிபோன் தப்பித்துக் கொள்ளாதபடி அவனை அடைத்து வைத்தான்.

²⁶ சீமோன் அவனுக்கு உதவியாக, தேர்ந்தெடுக்கப்பட்ட இரண்டாயிரம் வீரரும், வெள்ளியும் பொன்னும் திரளான பாத்திரங்களும் அனுப்பினார்.

²⁷ ஆனால், அந்தியோக்கஸ் அவற்றை ஏற்றக்கொள்ள மனமில்லாமல், சீமோனுடன் தான் செய்திருந்த உடன்படிக்கையை உதறி விட்டு அவரை விட்டகன்றான்.

²⁸ அதன் பிறகு, சீமோனுடன் பேச்சு நடத்தத் தன் நண்பரில் ஒருவனான அத்தேனோபியுசை அனுப்பி: நீங்கள் எமது நாட்டின் நகரங்களாகிய யோப்பா, காசாரா, யெருசலேம் கோட்டை இவைகளைக் கைப்பற்றி இருக்கிறீர்கள்.

²⁹ அவைகளைக் கொடுமைப்படுத்தி, நாட்டில் பெருந்தீமைகள் புரிந்து, எமது நாட்டின் பல இடங்களில் ஆட்சி செலுத்துகிறீர்கள்.

³⁰ இப்போது நீங்கள் கைப்பற்றியுள்ள நகரங்களை விட்டு விட்டு, யூதேயாவின் எல்லைக்கு அப்பால் நீங்கள் ஆட்சி செலுத்தி வந்த நாடுகளின் திறையைச் செலுத்தி விடுங்கள்.

³¹ இல்லாவிடில் அவைகளுக்காக ஐந்நூறு வெள்ளித் தாலேந்துகளுக்காகக் கட்டவேண்டிய கப்பங்களுக்கும் பதிலாக வேறு ஐந்நூறு தாலேந்துகளும் கட்டி விடுங்கள். தவறினால் உங்களைத் தாக்குவோம் என்று சொல்லச் சொன்னான்.

³² மன்னனின் நண்பன் அந்தேனோபியுஸ் யெருசலேம் வந்து, சீமோனுடைய ஆடம்பர மாட்சியையும், பொன்னும் வெள்ளியும் நிறைந்திருந்த மகிமையையும், எங்கும் விளங்கிய அலங்காரத்தையும் கண்டு வாயடைத்து நின்றான்.

³³ மன்னனுடைய வார்த்தைகளை அவனுக்கு அறிவித்தான். சீமோன் அவனுக்கு மறுமொழியாக: நாங்கள் அன்னிய நாட்டைப் பிடித்துக் கொள்ளவுமில்லை@ அன்னியப் பொருட்களை வைத்துக் கொள்ளவுமில்லை. ஆனால், எங்கள் பகைவரால், சிறிது காலமாக அநியாயமாய்ப் பறிக்கப்பட்டிருந்த எங்கள் முன்னோரின் சொத்துக்களைத் திரும்பப் பெற்றுள்ளோம்.

³⁴ தக்க சமயம் வாய்த்தமையால் எங்கள் முன்னோரின் சொத்துகளை நாங்கள் திரும்பவும் அடைந்தோம்.

³⁵ ஆனால், நீ கோரும் யோப்பா, காசாராவைப் பொறுத்த மட்டில், அந்நகரங்கள் எங்கள் மக்களுக்கும் நாட்டுக்கும் பெருந்தீமைகள் செய்தன. ஆயினும், அவைகளுக்காக நூறு தாலேந்துகள் கொடுப்போம் என்று கூறினார். அத்தேனோபியுஸ் மறுமொழி ஒன்றும் சொல்லவில்லை.

³⁶ மன்னனிடம் கோபமாய்த் திரும்பிப் போய், தான் கேட்டதையும் சீமோனின் மாட்சியையும் தான் கண்ட யாவற்றையும் அறிவித்தான். மன்னன் பெரும் சினங்கொண்டான்.

³⁷ இதற்கிடையே திரிபோன் ஒர்த்தோசியாதாவுக்கு கப்பலில் ஓடிப்போனான்.

³⁸ அந்தியோக்கஸ் மன்னன் செந்தேபேயுசைக் கடற்கரைப் பகுதிக்குத் தலைவனாக நியமித்து, காலாட் படையையும் குதிரைப் படையையும் அவனிடம் ஒப்படைத்தான்.

³⁹ யூதேயா நாட்டுக்கு எதிரில் பாளையம் இறங்கவும், கெதோரைக் கட்டவும், நகரத்தின் கதவுகளை அடைக்கவும், மக்களை எதிர்க்கவும் அவனுக்குக் கட்டளையிட்டான். மன்னனோ திரிபோனைப் பின்தொடர்ந்து போனான்.

⁴⁰ செந்தேபேயுஸ், யாம்னியா சேர்ந்து மக்களை வதைக்கவும், யூதேயா நாட்டைக் கொள்ளையடிக்கவும், மக்களைச் சிறைசெய்யவும் சாகடிக்கவும், கெதோரைக் கட்டவும் தொடங்கினான்.

⁴¹ மன்னன் கட்டளைப்படி யூதேயா நாட்டில் புகுந்து நடமாட, அவ்விடத்தில் குதிரைப் படையையும் சேனைகளையும் நியமித்தான்.