¹ முதலில் கிரேசியாவில் ஆண்டு, பிறகு மசதோனியாவில் செங்கோல் செலுத்தின பிலிப்பு என்பவனின் புதல்வனான அலெக்சாந்தர் சேத்திம் நாட்டினின்று புறப்பட்டுப் பாரசீகருடையவும் மேதாருடையவும் அரசனான தாரியுஸ் என்பவனை வென்ற பிறகு,

² போர்கள் பல புரிந்து வலிமை மிக்க கோட்டைகள் அனைத்தையும் பிடித்து, தன்னை எதிர்த்த அரசர்களைக் கொலை செய்து,

³ பூமியின் எல்லைகள் வரைக்கும் சென்று, எல்லா இனத்தாரையும் கொள்ளையடித்தான். பூமி முழுவதும் அவன் முன்பாக ஒடுங்கி அடங்கியது.

⁴ அவன் வலிமையுள்ள சேனைகளைச் சேர்த்துப் பெரியதொரு படையை நிறுவினான். ஆதலால் அவன் மனம் செருக்குற்று அகந்தை கொண்டது.

⁵ அவன் பல நாடுகளையும் அரசர்களையும் அடிமைப்படுத்தினான், அவர்களும் அவனுக்குத் திறை செலுத்தினார்கள்.

⁶ அதன் பிறகு அவன் கடின நோயுற்று, தான் சாகப்போவதை அறிந்தான்.

⁷ ஆதலால், தன்னுடன் வளர்க்கப்பட்ட இளம் வயதினரான பிரபுக்களை அழைத்து, தான் உயிரோடிருக்கும் போதே தன் நாட்டை அவர்களுக்குப் பிரித்துக் கொடுத்தான்.

⁸ அலெக்சாந்தர் பன்னிரண்டு ஆண்டுகள் ஆண்ட பிறகு இறந்தான்.

⁹ பிரபுக்களும் தங்கள் தங்களுக்கு நியமிக்கப்பட்ட இடங்களில் அரசர் ஆனார்கள்.

¹⁰ அவன் இறந்த பின் அவர்கள் எல்லாரும் முடிபுனைந்து, அவர்களுக்குப் பின் அவர்கள் பிள்ளைகளும் பல ஆண்டுகளாய் ஆண்டு வந்தார்கள். பூமியில் தீமைகளும் மிகுதி ஆயின.

¹¹ அவர்களின் தலைமுறைகளில் அந்தியோக்கஸ் அரசனின் புதல்வனான பெரிய அந்தியோக்கஸ் கிரேக்க அரசின் நூற்று முப்பத்தேழாம் ஆண்டு ஆண்டான்.

¹² இவன் உரோமையில் பிணையாளனாக இருந்தவன். அக்காலத்தில் இஸ்ராயேலில் தீயவர் பலர் தோன்றி: நம்மைச் சுற்றிலும் இருக்கும் இனத்தாரோடு நாம் உடன்படிக்கை செய்து கொள்வோம். ஏனென்றால், நாம் அவர்களை விட்டுப் பிரிந்திருந்த காலமெல்லாம் நம்மைப் பலவிதத் தீமைகள் சூழ்ந்து கொண்டன என்று மற்றவர்களிடம் கூறினார்கள்.

¹³ அவர்கள் சொன்னது மற்றவர்களுக்கும் நல்லதாகத் தோன்றியது.

¹⁴ ஆதலால், அவர்கள் சிலரை நியமித்தனர். அவர்கள் அரசனிடம் செல்ல, அரசனும் புறவினத்தாரின் வழக்கங்களை அவர்களும் அனுசரிக்க அனுமதி அளித்தான்.

¹⁵ புற மதத்தாருடைய வழக்கம் போல், அவர்களும் யெருசலேமில் கல்விக்கூடம் ஒன்று ஏற்படுத்தினார்கள்.

¹⁶ தங்கள் பரிசுத்த உடன்படிக்கையை விட்டு விட்டு, நூதன ஏற்பாடுகளை அனுசரித்து, அன்னியர்களோடு கலந்து, பொல்லாங்குகளுக்குத் தங்களையே கையளித்தார்கள்.

¹⁷ அந்தியோக்கஸ் தன் அரசை உறுதிப்படுத்திய பின்னர், எகிப்து நாட்டிலும் அரசாளத் தொடங்கினான்@ இரண்டு நாடுகளையும் ஆண்டு வந்தான்.

¹⁸ வலிமை பொருந்திய சேனைகள், தேர்கள், யானைகள், குதிரைகள், கப்பல்கள் இவைகளோடு எகிப்து நாட்டில் புகுந்து.

¹⁹ எகிப்து மன்னனான தோலெமேயுசோடு அவன் போர்தொடுக்கவே, தோலெமேயுஸ் பயந்து, எதிர்த்து நிற்க மாட்டாமல் ஓடினான்.

²⁰ பலரும் காயமுற்று மடிந்தார்கள். அவன் எகிப்து நாட்டில் பல கோட்டைகளைப் பிடித்தான். நாடெங்கும் கொள்ளையடித்தான்.

²¹ எகிப்தைக் கொள்ளையடித்த பிறகு அந்தியோக்கஸ் நூற்று நாற்பத்து மூன்றாம் ஆண்டு திரும்பி, இஸ்ராயேலைத் தாக்கி,

²² வலிமை பொருந்திய சேனையோடு யெருசலேம் சென்றான்.

²³ அகந்தைச் செருக்கோடு கடவுள் ஆலயத்தில் புகுந்து, பொற்பீடத்தையும் விளக்குத் தண்டுகளையும் எல்லாப் பாத்திரங்களையும், அப்பங்கள் வைக்கப்படும் மேசைகளையும், தட்டுகளையும் கிண்ணங்களையும், பொன் தூபக் கலசங்களையும், திரையையும் முடிகளையும், ஆலயத்தின் முகப்பில் இருந்த பொன் அணிகளையும் கொள்ளையடித்து உடைத்து விட்டான்.

²⁴ வெள்ளி, பொன், விலையுயர்ந்த பாத்திரங்கள் ஒளித்து வைத்திருந்த செல்வங்கள் இவைகளையெல்லாம் கொள்ளையடித்துத் தன் நாடு திரும்பினான்.

²⁵ மனிதரைக் கொன்று, அதிகச் செருக்குற்றிருந்தான்.

²⁶ இஸ்ராயேல் மக்களிடையேயும், அவர்கள் நாடெங்கும் அழுகை புலம்பலாக இருந்தது.

²⁷ பிரபுக்களும் மூத்தோர்களும் புலம்பினார்கள். கன்னிப்பெண்களும் இளைஞரும் நலிந்தனர். பெண்களின் அழகு மாறிப்போயிற்று.

²⁸ ஆடவர் எல்லாரும் முறையிட்டு அழுதார்கள். மரணப்படுக்கையில் அமர்ந்திருந்த பெண்கள் எல்லாரும் கண்ணீர் விட்டார்கள்.

²⁹ மக்கள் படும் துன்பத்தைக் கண்ட பூமியும் இளகினது. யாக்கோபு குலமும் துக்கத்தில் மூழ்கினது.

³⁰ இரண்டு ஆண்டுகளுக்குப் பிறகு, அரசன் திறை வாங்கும் தலைவன் ஒருவனை யூத நகரங்களுக்கெல்லாம் அனுப்பினான். அவன் பல சேனைகளோடு யெருசலேம் சேர்ந்தான்.

³¹ அவன் அவர்களுக்குச் சமாதான வார்த்தைகளைக் கபடமாய்ச் சொல்லவே, அவர்களும் நம்பினார்கள்.

³² அவன் திடீரென்று நகரத்திற்குள் பாய்ந்து, மக்களை வெகுவாய் வதைத்து இஸ்ராயேலரில் பலரைக் கொன்றான்.

³³ நகரத்தைக் கொள்ளையடித்து, அதைக் கொளுத்தி வீடுகளை இடித்து, சுற்று மதில்களைத் தகர்த்து எறிந்தான்.

³⁴ பெண்களைச் சிறைப்படுத்தி, பிள்ளைகளையும் ஆடு மாடுகளையும் வீரர்கள் கொண்டு போனார்கள்.

³⁵ அவர்கள் தாவீதின் நகரத்தைப் பெரிய மதில்களாலும் கோபுரங்களாலும் வலுப்படுத்தி, அதைத் தங்கள் கோட்டையாக்கிக் கொண்டார்கள்.

³⁶ தீயவரையும் கயவரையும் அவ்விடத்தில் நிறுத்தி வலுப்படுத்தினார்கள். போர்க்கருவிகளையும் உணவு வகைகளையும் சேகரித்து, யெருசலேமில் கொள்ளையடித்த பொருட்களையும் சேர்த்து வைத்தார்கள்.

³⁷ அவ்விடத்திலேயே அவர்கள் தங்கி உளவு பார்த்துக் கொண்டிருந்தார்கள்.

³⁸ கடவுளின் ஆலயத்திற்கு வருகிறவர்களுக்குத் தீங்காகவும், இஸ்ராயேலைக் கெடுக்கத் தேடும் பசாசைப் போலவும் இருந்தார்கள்.

³⁹ புனித இடத்தைச் சுற்றிலும் மாசற்ற இரத்தத்தைச் சிந்தி, அதைத் தீட்டுப்படுத்தினார்கள்.

⁴⁰ ஆதலால், அவர்களை முன்னிட்டு யெருசலேம் நகரத்தார் அதை விட்டு ஓடிப்போனார்கள். யெருசலேம் அன்னியருக்கு இருப்பிடமானது@ உரியவருக்கோ அன்னியமானது. மக்கள் அதை விட்டு அகன்றார்கள்.

⁴¹ கடவுளின் ஆலயம் பாழாகிப் பாலைவனம் போல் ஆனது. திருநாட்கள் துக்க நாட்களாக மாறின. ஓய்வு நாட்கள் அசட்டை செய்யப்பட்டு, அவற்றின் பெருமை குலையலாயிற்று.

⁴² அது எவ்வளவுக்குப் பெருமையுற்றிருந்ததோ அவ்வளவுக்குச் சிறுமையும் அவமானமும் அடைந்தது, அதன் பெருமை துக்கமாய் மாறியது.

⁴³ அந்தியோக்கஸ் மன்னன் தன் நாட்டு மக்கள் எல்லாரும் ஒன்றாய் இருக்க வேண்டுமென்றும், தத்தம் வழக்கங்களை விட்டுவிட வேண்டுமென்றும் ஓலை அனுப்பினான்.

⁴⁴ அந்தியோக்கஸ் மன்னனின் வார்த்தைப்படி நடக்க எல்லாரும் இசைந்தார்கள்.

⁴⁵ இஸ்ராயேலரிலும் பலர் அவனுக்கு அடிமைகளாக இசைந்து, சிலைகளுக்குப் பலியிட்டு ஓய்வுநாளைக் கெடுத்தார்கள்.

⁴⁶ யூதர்களும் மற்றவர்களுடைய வழக்கங்களை அனுசரிக்கும்படி, யெருசலேமுக்கும் யூத நகரங்களுக்கும் சட்ட நூல்களைத் தூதர் வழியாக மன்னன் அனுப்பினான்.

⁴⁷ அவர்கள் கடவுளின் ஆலயத்தில் பலிகளும், மற்ற இறை வழிபாடுகளும் நடவாதபடிக்கும்,

⁴⁸ ஓய்வு நாட்களையும் மற்றத் திருநாட்களையும் அனுசரியாதபடிக்கும் தடுத்தார்கள்.

⁴⁹ அரசன் புனித இடங்களையும், புனித இஸ்ராயேலரையும் கறைப்படுத்தும்படிக்கும் கட்டளையிட்டான்.

⁵⁰ பீடங்கள், கோயில்கள், சிலைகள் இவைகளை அமைக்கவும், பன்றிகளையும் அசுத்தமான மிருகங்களையும் பலியிடவும் கட்டளையிட்டான்.

⁵¹ கடவுளின் கட்டளைகளையும், அவருடைய ஏற்பாடுகள் அனைத்தையும் மறந்து போகும்படியாகத் தங்கள் பிள்ளைகளை விருத்தசேதமின்றி விட்டு விடும்படிக்கும், அசுத்தமான பொருட்களாலும் தீய செயல்களாலும் அவர்கள் ஆன்மாக்களைக் கெடுக்கவும் கட்டளையிட்டான்.

⁵² அந்தியோக்கஸ் மன்னன் கட்டளைப்படி நடவாதவர்கள் சாவார்கள் என்று கட்டளை விதிக்கப்பட்டது.

⁵³ இவ்வாறே நாடெங்கும் எழுதியனுப்பி, அதை அனுசரிக்கும்படி கட்டாயப்படுத்துவதற்கு அவன் தலைவர்களை நியமித்தான்.

⁵⁴ யூத நகரங்கள் பலிகொடுக்கும்படி அவர்கள் கட்டளையிட்டார்கள்.

⁵⁵ கடவுளுடைய கட்டளைகளை மீறியவர்களோடு வேறு பலரும் சேர்ந்து கொண்டு, நாட்டில் பற்பல தீமைகளைச் செய்தார்கள்.

⁵⁶ இஸ்ராயேல் மக்களைத் தனியிடங்களுக்கும் மறைவிடங்களுக்கும் துரத்த, அவர்கள் ஓடி ஒளிந்து கொண்டார்கள்.

⁵⁷ நூற்று நாற்பத்தைந்தாம் ஆண்டு காஸ்லேயு மாதம் பதினைந்தாம் நாள் கடவுளுடைய பீடத்தின் மேல் வெறுப்பூட்டும் சிலையை அவன் நிறுவினான்.

⁵⁸ யூத நகரங்களைச் சுற்றிலும் அவர்கள் பீடங்களைக் கட்டினார்கள், வீடுகளின் கதவுகளுக்கு முன்பாகவும், மைதானங்களிலும் சாம்பிராணி ஏந்திப் பலியிட்டார்கள்.

⁵⁹ கடவுளின் கட்டளைகள் அடங்கிய நூல்களைக் கிழித்து நெருப்பிலே எறிந்தார்கள்.

⁶⁰ எவனெவனிடம் மறைநூல்களைக் கண்டார்களோ அவனையும், கடவுளின் கட்டளைகளை அனுசரிக்கிறவனையும் அரசன் ஆணைப்படி கொன்றார்கள்.

⁶¹ எல்லா நாடுகளிலும் எல்லா மாதங்களிலும் இஸ்ராயேல் மக்களில் எவரெவரைக் கண்டார்களோ அவர்களை எல்லாம் இவ்விதமாய்க் கொடுமை செய்தார்கள்.

⁶² மாதத்தின் இருபத்தைந்தாம் நாள் பீடத்துக்கு முன்பாக இருந்த மேடையில் பலியிட்டார்கள்.

⁶³ தங்கள் பிள்ளைகளுக்கு விருத்தசேதனம் செய்வித்த பெண்களை அந்தியோக்கஸ் கட்டளைப்படி அவர்கள் கொன்றார்கள்.

⁶⁴ வீடுதோறும் பிள்ளைகளைத் தாய்மார் கழுத்திலும் தூக்கிட்டு, அவர்களுக்கு விருத்தசேதனம் செய்தவர்களைக் கொலைச் செய்தார்கள்.

⁶⁵ இஸ்ராயேலரில் பலர் அசுத்தமான உணவுப் பொருட்களைச் சாப்பிடுவதில்லையென்று தங்களுக்குள் தீர்மானம் செய்து கொண்டார்கள். அசுத்தமான உணவுப் பொருட்களைச் சாப்பிட்டுத் தங்களை மாசுப்படுத்திக் கொள்வதை விடச் சாகத் துணிந்திருந்தார்கள்.

⁶⁶ கடவுளின் புனித கட்டளைகளை மீற மனமற்றவர்களாய் இருந்தார்கள். ஆதலால், கொலையுண்டார்கள். எனவே மக்கள் மிக்க கோபம் கொண்டனர்.