பண்பாட்டுப் பங்களிப்பு

இராஷ்டிரகூடர்கள் வடமொழியை பெரிதும் ஆதரித்தனர். இராஷ்டிரகூட அரசவையில் பல அறிஞர்கள் இருந்தனர். நலிசம்பு என்ற நூலை திருவிக்ரமன் எழுதினார். மூன்றாம் கிருஷ்ணரது ஆட்சிக் காலத்தில் ஹெளயுதா என்பவர் கவிரஹஸ்யம் என்ற நூலைப் படைத்தார். இராஷ்டிரகூடர்களின் அரவணைப்பினால் சமணசமய இலக்கியங்களும் வளர்ச்சி பெற்றன. சமணரான முதலாம் அமோகவர்ஷர் பல சமண அறிஞர்களை ஆதரித்தார். அவரது ஆசிரியரான ஜீனசேனர் பார்கவநாதரின் வாழ்க்கை வரலாற்றை செய்யுள் நடையில் 'பார்சவபூதயா' என்ற தலைப்பில் எழுதினார். பல்வேறு சமண முனிவர்களின் வாழ்க்கை வரலாறுகளைத் தொகுத்து ஆதிபுராணம் என்ற தலைப்பில் குணபத்ரர் என்பவர் எழுதினார். அமோக விருத்தி என்ற இலக்கண நூலை சாகதாயனா என்பவர் படைத்தார். வீராச்சாரியார் என்ற அக்கால கணிதமேதை 'கணிதசாரம்' என்ற நூலை எழுதினார். இராஷ்டிரகூடர்களின் ஆட்சிக்காலத்தில் கன்னட இலக்கியமும் வளர்ச்சி கண்டது. அமோகவர்ஷர் இயற்றிய கவிராஜமார்க்கம் கன்னடமொழியில் எழுதப்பட்ட முதல் கவிதை நூலாகும். பம்பா என்பவர் கன்னடமொழிக் கவிஞர்களில் தலைசிறந்தவர். அவரது புகழ்பெற்ற நூல் 'விக்ரமசேனவிஜயம்'. பொன்னா என்ற மற்றொரு கன்னடக் கவிஞர் 'சாந்திபூரணா' என்ற நூலை எழுதினார்.

கலை, கட்டிடக் கலை

இராஷ்டிரகூடர்களின் கலை, கட்டிடக் கலையை எல்லோரா மற்றும் எலிபான்டாவில் காணலாம். எல்லோராவில் உள்ள புகழ்பெற்ற கோயில் கைலாசர் கோயிலாகும். முதலாம் கிருஷ்ணர் காலத்தில் இக்கோயில் வடிக்கப்பட்டது. இருநூறு அடி நீளமும், நூறு அடி அகலம், உயரம் கொண்ட பிரமாண்டமான கல்லில் இது வடிக்கப்பட்டுள்ளது. இக்கோயிலில் நான்கு பகுதிகள் உள்ளன - மூலக்கோயில், நுழைவாயில், நந்திமண்டபம், முகமண்டபம். 25 அடி உயரமுடைய மேடையின்மீது இக்கோயில் கம்பீரமாக நிற்கிறது. மேடையின் முகப்பில் யானைகளும், சிங்கங்களும் மேடையை தாங்குவது போல செதுக்கப்பட்டுள்ளன. மூன்றடுக்கு சிகரம் மாமல்லபுரம் ரதங்களை நினைவுபடுத்துகிறது. கோயிலுக்குள் பதினாறு சதுரத் தூண்கள் கொண்ட மண்டபம் உள்ளது. அழகிய சிற்பங்களைக் கொண்ட கைலாசர் கோயில் உண்மையில் கட்டிடக்கலையின் பிரமாண்டம் எனலாம். துர்கை எருதுமுக அரக்கனை கொல்வது போன்ற சிற்பம் மகத்தானது. ராவணன் கைலாச மலையை தூக்க முயற்சிப்பது போன்ற சிற்பம் குறிப்பிடத்தக்கது. சுவர்களில் இராமயணக் காட்சிகள் செதுக்கப்பட்டுள்ளன. கைலாசர் கோயிலின் பொதுப் பண்பு திராவிடகலைப் பாணியைச் சார்ந்தது.

பம்பாய்க்கு அருகிலுள்ள தீவு எலிபான்டா. முதலில் அது ஸ்ரீபுரி என்று அழைக்கப்பட்டது. பெரிய யானையின் சிற்பத்தை கண்ட போர்ச்சுகீசியர்கள் அதற்கு எலிபான்டா என்ற பெயரிட்டு அழைத்தனர். அங்கு இராஷ்டிரகூடர்களின் கலை அதன் உச்ச கட்டத்தை எட்டியது எனலாம். எல்லோரா, எலிபான்டா சிற்பங்களுக்கிடையே ஒற்றுமையைக் காணமுடிகிறது. அவற்றை ஒரே குழுவைச் சேர்ந்த சிற்பிகள் உருவாக்கியிருக்க வேண்டும். கருவறைக்குள் நுழைவுமுன் உள்ள துவாரபாலகர் சிலை பிரமாண்ட வடிவிலானது. சுற்றுச் சுவர்களில் நடராஜர், கங்காதரர், அர்த்த நாரிஸ்வரர், சோமஸ்கந்தர் என்று சிவனின் பல வடிவங்கள் தீட்டப்பட்டுள்ளன. திருமூர்த்தி உருவம் மிகப்பெரியது. ஆறு மீட்டர் உயரமுடையது. படைத்தல், காத்தல், அழித்தல் என்ற மூன்று தொழில்களையும் செய்யும் சிவனை அது பிரதிபலிப்பதாகக் கூறப்படுகிறது.

---