¹ தன் ஆட்சியின் பதின்மூன்றாம் ஆண்டு, முதல் மாதம் இருபத்திரண்டாம் நாளன்று, அசீரிய அரசன் நபுக்கோதனசார் பழிவாங்கப் போவதாக அரண்மனை முழுவதும் பேச்சு அடிப்பட்டது.

² ஆதலால், அவன் மூப்பர் அனைவரையும் படைத் தலைவர்களையும் படை வீரர்களையும் வரவழைத்துத் தன் இரகசிய எண்ணத்தை அவர்களுக்கு வெளிப்படுத்தினான்.

³ மண்ணகம் முழுவதையும் தனது ஆதிக்கத்திற்குள் கொணர்வதே தன் எண்ணம் எனக் கூறினான்.

⁴ அதைக் கேட்ட அவர்கள் யாவரும் மகிழ்வுற்றனர், எனவே, அரசன் நபுக்கோதனசார் படைத் தலைவன் ஒலொபெர்னெசை, தன்னிடம் அழைத்தான்.

⁵ அவனை நோக்கி," நீ மேற்கு நாட்டினர் அனைவர் மீதும், குறிப்பாக நமது கட்டளையைப் புறக்கணித்த மக்கள் மீதும் படையெடுத்துச் செல்.

⁶ எந்த நாட்டுக்கும் இரக்கம் காட்டாதே. அரணுள்ள நகர்கள் அனைவற்றையும் என் கீழ்க் கொணர்வாய் என்று கட்டளையிட்டான்.

⁷ ஒலொபெர்னெஸ் உடனே அசீரியத் தலைவர்களையும் ஏனைய படைத்தளபதிகளையும் அலுவலர்களையும் வரவழைத்து அரசன் கட்டளையிட்ட படி போருக்குச் செல்ல வேண்டிய வீரர்களைக் கணக்கிட்டான். அவர்கள் நூற்றிருபதினாயிரம் காலாட்படையினரும் வில் எய்யும் பன்னிரண்டாயிரம் குதிரைப்படையினரும் ஆவர்.

⁸ மேலும், அவன் தன் படையினருக்குத் தேவையான உணவுப் பொருட்களை ஏராளமாய்ச் சுமந்து சென்ற எண்ணற்ற ஒட்டகங்களையும், கணக்கிலடங்கா ஆடு மாடுகளையும் அவர்களுக்கு முன் அனுப்பி வைத்தான்.

⁹ அத்தோடு வழியுணவுக்குத் தேவையாயிருந்த தானியத்தைச் சீரியா முழுவதுமிருந்து சேகரித்து வைக்கக் கட்டளையிட்டான்.

¹⁰ அதுவுமின்றி, அரண்மனையிலிருந்து ஏராளமான பொன்னும் வெள்ளியும் எடுத்துக் கொண்டான்.

¹¹ இவ்வாறு அவனும் அவனுடைய தேர்ப்படையினர், குதிரைப்படையினர், வில்படையினர் ஆக எல்லாப் படைவீரர்களும் வெட்டுக்கிளிகளைப் போல் பூமியை நிரப்பிக் கொண்டு புறப்பட்டுப் போனார்கள்.

¹² ஒலொபெர்னெஸ் அசீரியரின் எல்லைகளைக் கடந்ததும், சிலிசியாவின் இடப்பக்கத்திலிருந்த ~ஆங்கே~ என்றே பெரிய மலைகட்குச் சென்று அவற்றின் எல்லாக் கோட்டை கொத்தளங்களையும் கைப்பற்றினான்.

¹³ மேலும் பேரும் புகழும் வாய்ந்த ~மேலோத்தி~ என்ற நகரைத் தாக்கி அதையும் கைப்பற்றினான், தார்சீஸ் நகரின் குடிகளையும், பாலைவனப் பகுதியிலும் ~கெல்லோன்~ என்ற நாட்டிற்குத் தெற்கேயும் குடியிருந்த இஸ்மாயேல் குலத்தாரையும் கொள்ளையடித்துச் சென்றான்.

¹⁴ பின் யூப்ரடீஸ் நதியைத் தாண்டி மெசொப்பொத்தேமியா நாட்டில் புகுந்து, மாம்பிரே ஆறு தொடங்கிக் கடல் வரை இருந்த சிறந்த நகர்கள் அனைத்தையும் அழித்தான்.

¹⁵ சிலிசியா தொடங்கித் தெற்கே யாப்பேத்தின் எல்லை வரையிலுமிருந்த நாடு முழுவதையும் கைப்பற்றினான். அன்றியும், மேதியர் அனைவரையும் சிறைப்படுத்தி,

¹⁶ அவர்கள் செல்வங்களையெல்லாம் கொள்ளையடித்தான். தன்னை எதிர்த்து நின்ற அனைவரையும் வாளுக்கு இரையாக்கினான்.

¹⁷ அறுவடைக்காலத்தில் அவன் தமாஸ்கு நகர வயல்வெளிகளில் இறங்கி விளைச்சலை எல்லாம் தீக்கிரையாக்கினான். எல்லா மரங்களையும் திராட்சைத் தோட்டங்களையும் அழித்தான்.

¹⁸ எனவே, அந்நாட்டுக் குடிகள் அனைவரும் அவனுக்கு அஞ்சி நடுங்கினார்.