டாக்டர் ஒருவர் புதிதாக மருத்துவம் பார்க்கத் தொடங்கி இருந்தார். அவரைத் தேடி ஒருவர் வந்தார்.

தான் எப்பொழுதும் சுறுசுறுப்பாக வேலை பார்ப்பவர் என்பதைக் காட்ட விரும்பிய டாக்டர், டெலிபோனைக் காதில் வைத்து "என்ன அவசர கேசா? நான் வீட்டிற்கு வந்து மருத்துவம் பார்க்க வேண்டுமானால் ரூபாய் இருநூறு ஆகும். என்ன சொல்கிறீர்கள்? வரச் சொல்கிறீர்களா? இங்கே ஒரு நோயாளி வந்திருக்கிறார். அவரைப் பார்த்து விட்டு இன்னும் அரை மணி நேரத்துல வந்துவிடுகிறேன்" என்று சொல்லிவிட்டுப் போனை வைத்தார்.

பிறகு வந்தவரைப் பார்த்து "உங்கள் உடம்புக்கு என்ன?" என்று கேட்டார்.

"நான் உங்கள் டெலிபோனுக்குத் தொடர்பு கொடுக்க தொலைபேசித் துறையிலிருந்து வருகிறேன்" என்றார் வந்தவர்.