நட்சத்திர ஹோட்டல் - நீனா
நம்மூரில் பெரும்பாலும் ஒரு தொழிலதிபரின் மகளோ அல்லது மனைவியோ, தன் குடும்பத்தைச் சேர்ந்த ஆணைப் போல பிஸினஸில் கொடிகட்டிப் பறக்க வேண்டும் என்று நினைப்பதில்லை. சம்பாதிப்பது ஆண்களின் வேலை என்ற நினைப்பில் பல வீடுகளில் ஆண்களும் இதை அனுமதிப்பதில்லை. அதனால் பிஸினஸ் குடும்பத்துப் பெண்கள், பெரும்பாலும் தங்கள் வீட்டை கவனித்துக் கொண்டாலே போதும்.... பார்ட்டிகளிலும், விசேஷங்களிலும் தங்கள் குடும்ப கௌரவத்தை நிலைநாட்டும் வகையில், கிலோ கணக்கில் தங்க நகைகளைச் சுமந்து போகும் அழகுப் பதுமைகளாக இருந்தாலே போதும் என்று கண்ணுக்குத் தெரியாத எல்லை வகுத்துக் கொண்டுவிடுகிறார்கள்.
சில பெண்கள் மட்டுமே இதற்கு விதிவிலக்காக இருந்து தங்கள் திறமைகளை ஏதாவதொரு வழியில் வெற்றிகரமாக வெளிப்படுத்திக் கொண்டிருக்கிறார்கள். நீனா ரெட்டியும் கூட அப்படித்தான் தன்னுடைய திறமைகளை வெற்றிகரமாக வெளிப்படுத்திக் கொண்டவர்!
ஒரு பெண் தனியாக ஒரு ஹோட்டலுக்கு வந்தாலோ அல்லது அங்கு அவள் பணிபுரிகிறாள் என்றாலோ கௌரவக் குறைச்சல் என்றிருந்த ஒரு காலகட்டத்தில், தன் பொறுப்பில் ஒரு நட்சத்திர ஹோட்டலை எடுத்து அதை வெற்றிகரமாக நடத்தியும் காட்டியவர். சென்னையின் பிரபல நட்சத்திர ஹோட்டலான சவேராவின் எக்ஸிகியூடிவ் இயக்குனராக இருக்கும் நீனா ரெட்டி.
சட்டென்று பார்த்தால் நீனாரெட்டி ஒரு கல்லூரிப்பெண் போலத்தான் இருக்கிறார். அவருக்குக் கல்லூரி போகும் வயதில் மகள் இருக்கிறாள் என்றால் யாருமே நம்பத் தயங்குவார்கள்.
நம் பார்வையைப் புரிந்து கொண்டது போலவே தன் பேச்சை ஆரம்பித்தார். நீனா ரெட்டி. ''பெண்கள் தன்னுடைய மனதையும், உடலையும் கட்டுக்கோப்பாக வைத்திருப்பது ரொம்பவே முக்கியம். அப்போதுதான் அவர்கள் மற்ற விஷயங்களிலும் கவனம் செலுத்த முடியும்!'' என்கிறார் தத்துவார்த்தமாக.
நீனா பிறந்தது ஹைதராபாத்தில். அரசியலிலும் பிஸினஸிலும் புகழ்பெற்றது அவருடைய குடும்பம்! டிகிரி முடித்தவுடனே நீனாவுக்குத் திருமணம் நடந்திருக்கிறது. கணவருடைய குடும்பமோ ஹோட்டல் பிஸினஸில் பெயர் போனது. இரண்டு பெண் குழந்தைகள் பிறந்து அவர்கள் பள்ளிக்குச் செல்ல ஆரம்பிக்கும் வரை வீட்டை அழகாகப் பராமரிப்பதுதான் நீனாவின் பொழுதுபோக்கு.
''அப்போது சென்னை சவேரா ஹோட்டலை என் மாமனாரின் சகோதரர்தான் பார்த்துக் கொண்டிருந்தார். ஒரு கட்டத்துக்கு அப்புறம் ஹோட்டலின் பொறுப்புகளை என் மாமனார். என் கணவரிடமும், மைத்துனரிடமும் ஒப்படைக்க முடிவு செய்திருந்தார்.
அப்போதுதான் நானாக வலியச் சென்று என் மாமனாரிடம் ''நான் வேண்டுமானால், அவர்களுக்கு உதவியாக இருக்கட்டுமா?'' என்று கேட்டேன்.
நான் எங்கள் வீட்டை அழகுணர்ச்சியுடனும் பொறுப்புடனும் பராமரிப்பதில் காட்டிய அக்கறையைப் பற்றி நன்கு தெரிந்திருந்தவர் என் மாமனார். அதனால், கொஞ்சமும் தயங்காமல் ஹோட்டலைப் பார்த்துக் கொள்ளும் பொறுப்பை என்னிடம் முழுசாகவே ஒப்படைத்தார் அவர். பத்தாண்டுகளுக்கு முன்பு இப்படி என் கைக்கு வந்த சவேரா ஹோட்டலின் முழு நிர்வாகத்தையும் இப்போது நான்தான் கவனித்துக் கொண்டு வருகிறேன்.
சொல்லப்போனால் ஹோட்டல் நிர்வாகம் பற்றி நான் எந்தப் படிப்பையும் படிக்கவில்லை. ஒரு மிகப்பெரிய குடும்பத்தை நிர்வகித்த பொறுப்புதான். எனக்கு இந்த வாய்ப்பைப் பெற்றுத்தர காரணமாகவே இருந்தது. அனுபவத்தைவிட சிறந்த படிப்பு வேறு ஏது?'' என்று தன்னுடைய ஆரம்பகாலம் பற்றி உற்சாகமாகச் சொன்னார் நீனா ரெட்டி.
ஒரு காலகட்டத்தில் ஹோட்டல்களில் பணிபுரியும் பெண்கள் என்றாலே தவறான பார்வை இருந்தது... காரணம், ''ஹோட்டல்'' என்றாலே அது பெரும் பணக்காரர்களும், அரசியல் வாதிகளும், சினிமா பிரபலங்களும் உல்லாசமாக இருக்கும் இடம் என்ற தவறான கருத்து நிலவி வந்ததுதான். தவிர அப்போது ஹோட்டல்களில் ஆண்கள்தான் நிறையப்பேர் வேலையில் இருந்தவர்கள். இதனால் ஆண் வாடிக்கையாளர்கள்தான் பெரும்பாலும் ஹோட்டல்களுக்கு அதிகம் வந்தார்கள். இந்த நிலையில்தான், ஹோட்டல் கலாசாரத்தில் ஒரு முக்கிய மாற்றத்தை ஏற்படுத்தினார் நீனா ரெட்டி.
நீனா ஹோட்டல் பொறுப்பேற்றதிலிருந்து அதிகமாக பெண் வேலையாட்களையே நியமித்திருக்கிறார். ஹோட்டலின் இன்டீரியரிலும் பல மாற்றங்கள் செய்து ஒரு ''ஹோம்லி'' அட்மாஸ்பியரை ஹோட்டலில் உருவாக்கியிருக்கிறார். இதனால் பலர் குடும்பத்துடன் வர ஆரம்பித்திருக்கிறார்கள். இப்படி சின்னச் சின்ன விஷயங்களிலும் கவனம் எடுத்து மாற்றங்களைச் செய்ததால்தான் இன்று பிஸினஸைப் பெருக்கியிருக்கிறார் நீனா.
பெயரளவில் வெறுமனே பணக்காரப் பெண்களின் பொழுதுபோக்கு இடமாக இருந்த சவேரா ஹோட்டலின் ''டச்சஸ் கிளப்''பை அப்படியே உருமாற்றி பலவிதங்களில் மற்றவர்களுக்கு உதவும் வகையில், கிளப்பின் செயல்பாட்டை மாற்றியமைத்திருக்கிறார் நீனா. இன்று இந்த கிளப்பின் மூலம் பல பெண் தொழில் முனைவோரை ஊக்கப்படுத்தி வருகிறார்கள். ஒரு முதியோர் இல்லத்தை உருவாக்கும் எண்ணமும் இந்த நட்சத்திர ஹோட்டல் கிளப்புக்கு இருக்கிறது.
''இப்போதெல்லாம் நட்சத்திர ஹோட்டல்களில் போட்டி அதிகமாகிவிட்டது. பல ஊர்களிலிருந்து வரும் மக்களைக் கவருவதற்கு அவ்வப்போது மாற்றங்களைச் செய்து கொண்டே இருக்கவேண்டும். ஒவ்வொரு விஷயத்தையும் கூர்ந்து கவனித்துச் செய்தால்தான் இந்தப் போட்டியைச் சமாளிக்க முடியும். முக்கியமாக ஹோட்டலுக்கு வரும் வாடிக்கையாளர்கள் சொல்லும் கருத்துக்களைக் கேட்க வேண்டும். ஊழியர்கள் ஒவ்வொருவரின் கருத்துக்களையும்கூட விடக்கூடாது... அவற்றையும் கேட்டுத் தெரிந்துக் கொள்ள வேண்டும். இப்படி பல விஷயங்களை கவனித்தால் மட்டும்தான் தொழிலில் வெற்றியடைய முடியும்'' என்று தன்னுடைய வெற்றிக்குப் பின்னால உள்ள உழைப்பைக் கூறுகிறார் நீனா ரெட்டி.
ஹோட்டல் பிஸினஸ் என்று மட்டும் இல்லாமல் ''O 2'' என்ற பிரத்யோகமான ஹெல்த் அண்ட் ஃபிட்னஸ் ஸ்டுடியோவை சென்னையில் நடத்தி வருகிறார் நீனா ரெட்டி. இந்த ஃபிட்னஸ் ஸ்டுடியோவில் டயட்டீஷியனின் ஆலோசனையின் பேரில் அவர் சொல்லும் ''டயட்'' உணவுகள் இங்கேயே கிடைக்கும் என்பதுதான் இந்த ஃபிட்னஸ் ஸ்டுடியோவின் ஸ்பெஷல். இந்த வகை ஃபிட்னஸ் சென்டர்களை சென்னைக்குக் கொண்டு வந்ததே நீனா ரெட்டிதான்!
அடுத்தடுத்து தன் தொழிலில் வேறு என்ன புதுசாக செய்து தொடர்ந்து வெற்றியைப் பெறுவது என்று எப்போதும் சிந்தித்துக் கொண்டிருக்கும் இந்த பிஸினஸ் பெண்ணின் விருப்பம். உலகமெல்லாம் சுற்றி பல விஷயங்களையும் தெரிந்துகொள்ள வேண்டும் என்பதுதானாம்!
''பொதுவாக பெண்கள் நிறைய விஷயங்களைத் தெரிந்துகொள்வதில் ஆர்வம் காட்டுவார்கள். அவரவருக்கு முடிந்த சூழலில், முடிந்த வசதியில், முடிந்த விஷயங்களைத் தெரிந்து கொள்ள முயற்சிப்பார்கள். நிறைய விஷயங்களைத் தெரிந்து கொள்ள ஆரம்பித்தால்தான் நமக்குத் தெரியாமல் நம்மைச் சுற்றி நாமே கட்டிக்கொண்ட ''ஒன்றும் தெரியாதவள்'' என்ற சுவர் விலகுவதை உணரலாம்.
பெண்கள் எதற்கெடுத்தாலும் பயப்படுவதை முதலில் தவிர்த்துவிடவேண்டும். எந்தச் செயலைச் செய்வதற்கு முன்பும், அதை எப்படிப்பட்ட சூழலில் தொடங்குகிறோம் என்பது முக்கியம். அதிலும், இது பிஸினஸிற்கு மிக மிக அவசியம்!'' என்கிறார் நீனா.
''பிஸினஸைப் போல, குடும்பத்தைக் கவனித்துக் கொள்வதும் முக்கியம். என் இரு மகள்களும் எப்பொழுதெல்லாம் நான் வேண்டும் என்று நினைக்கிறார்களோ, அப்பொழுதெல்லாம முடிந்தவரை நான் அவர்களுடன் இருப்பேன்'' என்கிறார் பாசம் பொங்க.
நீனாவின் முதல் மகள் லண்டனில் பிஸினஸ் மேனேஜ்மெண்ட் படிக்கிறார். இன்னொருவர் பள்ளியில் படிக்கிறார். ''பெண்கள் அவர்களுடைய சொந்தக் காலில் நிற்கவேண்டும்! அதுதான் எந்தச் சூழ்நிலையிலும் அவர்களுக்கு நல்லது'' என்று வலியுறுத்துகிறார் நீனா.
தேடல் தொடர்பான தகவல்கள்:
நட்சத்திர ஹோட்டல் - நீனா, நீனா, பெண்கள், ஹோட்டல், ரெட்டி, நான், வேண்டும், பெண், நட்சத்திர, ஹோட்டலின், தன்னுடைய, ஃபிட்னஸ், பிஸினஸ், முடிந்த, பற்றி, இப்படி, ஹோட்டல்களில், விஷயங்களைத், செய்து, கொள்ள, முக்கியம், கவனித்துக், வீட்டை, தங்கள், வெற்றிகரமாக, பெரும்பாலும், என்கிறார், முடியும், சவேரா, Record Womens, சாதனை பெண்கள், Ladies Section, பெண்கள் பகுதி