தொழில்:

இம்மாவட்டத்தின் பெருந்தொழில் விவசாயமே. அதற்கடுத்து வடபாதிமங்கலத்தில் ஆரூரான் சர்க்கரை ஆலை நாடு சுதந்திரம் அடைந்த பின்னர் 1 கோடி ரூபாய் முதலீட்டில் தொடங்கப்பட்டு இன்றும் நல்ல முறையில் நடந்து வருகிறது. இதற்குத் தேவையான கரும்பை சுற்று வட்டாரங்களில் பயிர்செய்து இங்கு கொண்டுவரப்படுகிறது. இதற்கடுத்து முன்னாள் மத்திய அமைச்சர் டி.ஆர்.பாலுவின் முயற்சியால் மன்னார்குடியை அடுத்த வடசேரியில் இரசாயன ஆலை தொடங்கப்பட்டுள்ளது.

மன்னார்குடி:

1866 முதல் கோட்ட ஆட்சித் தலைமை அலுவலகம் உள்ள நகராக மன்னார்குடி உள்ளது. காட்டுமன்னார்குடியிலிருந்து இவ்வூரை வேறுபடுத்திக் காட்ட 'ராஜமன்னார்குடி' என்றும் அழைப்பர். மன்னையில் சோழர் கட்டிய மூன்று கோயில்கள் உள்ளன. ராஜகோபாலசாமி கோயில் ஆதியில் சமணர் கோயிலாக இருந்ததற்கான ஆதாரங்கள் உள்ளன. இப்போது இது வைணவக் கோயிலாக இருந்து வருகிறது. 16 கோபுரங்கள், 7 பிரகாரங்கள், ஒற்றைக் கருங்கல்லில் 16.5 மீட்டர் உயரமுள்ள கருடத்தூண், வரலாற்றுச் செய்திகள் அடங்கிய கல்வெட்டுக்கள், ஓவியச் சிறப்பு நிறைந்த பழங்காலத்துப் பாவை விளக்குகள் (திருவிளக்கு நாச்சியார்) ஆங்கிலேய அலுவலர் ஒருவர் செய்து வைத்த கருட வாகனம் ஆகியவை இக்கோயிலில் இருக்கின்றன. இக்கோயிலுக்குச் சற்று தொலைவில் 23 ஏக்கர் பரப்புள்ள ஒரு தெப்பக்குளம் இருக்கிறது.

தமிழ்ச்சமணர் சிலர் இன்றும் இவ்வூரில் வாழ்கின்றனர். சமணர் கோயில் ஒன்று இருக்கிறது. பித்தளை பாத்திரங்களும் இருப்புச் சட்டிகளும் ஓரளவு செய்யப்படுகின்றன. மன்னார்குடி வேட்டி எங்கும் புகழ்பெற்றது. அரசாங்கத்தாரால் தொடங்கப்பட்ட தச்சு - இரும்பு தொழிற்சாலையில் விவசாயக் கருவிகள் செய்யப்படுகின்றன. கோட்டூர் அரங்கசாமி முதலியார் நூலகம் இந்நகரில் காணத்தக்க அருங்கலைக்கூடமாகும். பள்ளிகள், கல்லூரிகள் இந்நகரில் உள்ளன. இந்நகரின் மேற்குக் கோடியிலுள்ள 'மேலவாசல்', ஒய்சாளர் கட்டிய அரண்மனையின் மேலவாயிலாக இருந்தது என்கிறார்கள் வரலாற்றாய்வாளர்கள்.

கோட்டூர்: தேவாரமும், திருவிசைப்பாவாலும் பாடப்பெற்ற 2 கோயில்கள் இவ்வூரில் உள்ளது. சோழ, நாயக்க, மராட்டிய மன்னர்களின் கல்வெட்டுக்கள் இக்கோயிலில் உள்ளன. இவ்வூர் கல்வெட்டை ஆதாரமாகக் கொண்டே சேக்கிழார் காலம் உறுதி செய்யப்பட்டிருக்கிறது. இவ்வூர் வள்ளல் அரங்கசாமி முதலியார் (1805-1907) 200 வேலி நிலமும், 12 இலட்சம் ரூபாயையும் அறச் செயலுக்காக எழுதி வைத்தார். மாணவர் இல்லம், நூல் நிலையம், புலவர் மன்றம், ராஜகோபாலசாமி கோயில் கட்டளைகள் முதலியன இவர் பெயரால் மன்னார்குடியில் நடைபெறுகின்றன.

கூத்தாநல்லூர்:

'சின்ன சிங்கப்பூர்' என்ற பெயரைப் பெற்றது இவ்வூர். கிராமங்களுக்கு நடுவில் மாடமாளிகைகள் சூழ நகர் அமைந்துள்ளது. இவ்வூர் முழுவதும் முஸ்லீம்கள் நிறைந்து வாழ்கின்றனர். இவர்கள் தென்கிழக்கு ஆசிய நாடுகள் முழுவதும் பரவி வணிகம், வேலைவாய்ப்பு பெற்று இந்நகரை செல்வச் செழிப்புமிக்கதாக மாற்றியுள்ளனர். ஒன்றுபட்ட தஞ்சை மாவட்டத்தில் முன்பு யாராவது வீடு கட்டவேண்டும் என்றால் 'கூத்தாநல்லூரை ஒருமுறை சுற்றிவிட்டு வாருங்கள்' என்று பொதுமக்கள் சொல்லும் அளவுக்கு பல மாளிகைகள் நிறைந்த ஊர். இன்றும்கூட 'ஐசா பேலஸை' பார்க்கலாம். சாரணபாஸ்கரதாஸ் என்கிற பெயரில் அரபு இலக்கியங்கள் மொழிபெயர்த்த பெரியவரும் இவ்வூர்காரர்தான். இவ்வூரையொட்டிய அத்திக்கடை, மரக்கடை முதலிய இடங்களிலும் முஸ்லீம்கள் நிறையபேர் வாழ்கின்றனர்.

வடபாதிமங்கலம்:

ஆரூரான் சர்க்கரை ஆலையால் இவ்வூர் புகழ்பெற்றது. இந்த ஆலை இருப்பதால் இவ்வூர் அருகிலுள்ள பல கிராமங்களில் கரும்பு பயிரிடப்பட்டு இங்கு அனுப்பப்படுகிறது. ஒன்றுபட்ட தஞ்சைமாவட்டத்தில் ஏற்பட்ட முதல் ஆலைகளில் இதுவும் ஒன்று. இதன் உரிமையாளரான தியாகராஜ முதலியார் இம்மாவட்ட சிறப்பு பிரமுகராவார்.