கதவு திறக்கவும் இல்லை. சிவன் வெளியில் வரவும் இல்லை. சிவன் கந்தமாதனக் கோயிலுக்குள் தங்கி விட்டார். நீண்ட நாட்களாக வெளிவரவில்லை என்ற செய்தி பரவியவுடன் தைத்தியர்களின் அட்டகாசம் அதிகமாயிற்று. பெருங்கலக்கமுற்ற தேவர்கள் ஒன்றுகூடி ஆராய்ந்தார்கள். பிரம்மனும், விஷ்ணுவும் அக்கூட்டத்தில் இருந்தனர். எப்படியாவது சிவனுடைய தனிமையைக் கலைத்து வெளியே வரச்செய்ய என்ன செய்யலாம் என்று யோசித்தனர். இறுதியாக அக்னிதேவனை அழைத்து, நீ எப்படியாவது கோயிலுக்குள் சென்று சிவனுடைய தனிமையைக் கலைக்க வேண்டும் என்று வேண்டிக் கொண்டார். ஆனால் சிவனுடைய கோயில் நந்தி தேவரால் வலுவாகக் காவல் செய்யப்பட்டது. அவரைத் தாண்டிச் செல்ல முடியாது என்று அறிந்த அக்னி, அணு உரு எடுத்துக் கொண்டு மெள்ள மெள்ள நகர்ந்து கோயிலுக்குள் சென்று விட்டார். அங்கு பார்வதியைச் சந்தித்த அவர் தனக்குப் பிச்சையிடுமாறு வேண்டினார். தங்கள் தனிமை கலைக்கப்பட்டதால் பார்வதியும் கோபம் அடைந்தார். ஆனால் பிச்சை என்று கேட்பவனுக்கு ஏதாவது கொடுக்க வேண்டுமென்று சிவனுடைய சக்தியில் ஒரு சிறு பாகத்தை அவனுக்குப் பிச்சையாக அளித்துவிட்டு, இந்தப் பிச்சையை அக்னி மூலம் ஏற்கின்ற உண்மை பேசுகின்ற தேவர்கள் அனைவரும் பெரிய சங்கடத்திற்குள்ளாவார்கள். இது என்னுடைய சாபம்” என்று முடித்தார் பார்வதி.

அக்னி மூலம் சிவனுடைய சக்தியைப் பிச்சையாக ஏற்ற தேவர்கள் பெரும் துன்பத்திற்கு உள்ளாயினர். (ஸ்கந்த புராணம் ஸ்கந்தனுடைய உற்பத்தியைக் கூறுகின்ற பகுதியை இரண்டு வேறுபட்ட பாடல்களால் கூறுகிறது. மேலே சொல்லப்பட்ட வகையில் இந்த இரண்டு வகைக்கும் அதிக வேறுபாடு இல்லை. அக்னி அணு உருவாகச் சென்றான் என்பது முதல் வகை இரண்டாவது வகை சிவன் அக்ன? வந்திருப்பதை அறிந்து தன் ஆற்றலின் ஒரு பகுதியை அவனிடம் தந்தான் என்று கூறுகிறது. இதற்குப் பிறகு இந்த 2 வகைப்பட்ட கதைகளும் பெறும் மாறுதல்களுடன் காணப் படுகின்றன) முதல்வகை: சிவனுடைய ஆற்றலை பார்வதி மூலம் பெற்றுக் கொண்ட அக்னியும், மற்ற தேவர்களும் பெரும் பிரச்சனைக்கு உள்ளானார்கள். தங்கள் உடம்பில் ஏற்பட்டுள்ள துன்பத்தைப் போக்கிக் கொள்ள வழி தெரியாமல் விஷ்ணுவிடம் சென்று முறையிட்டனர். விஷ்ணு அவர்களைப் பார்த்து நாம் அனைவரும் சிவனை நோக்கிப் பிரார்த்தனை செய்வோம். அது ஒன்றுதான் வழி என்றார். அனைவரும் சிவனை தியானித்துப் பிரார்த்தனை செய்தனர். சிவன் எதிர்ப்பட்டு அக்னியைத் தவிர மற்ற தேவர்கள் அனைவரும் உள்ளே இருக்கின்றதை வாந்தி எடுத்துவிடுமாறு கட்டளை இட்டார். அவர்களும் அப்படியே செய்தனர். அதனால் தங்கள் உடல் துன்பம் தீர்ந்தனர். அக்னியைப் பொறுத்தவரை யாராவது குளிரில் நடுங்கிக் கொண்டிருந்தால் அவர்களிடம் சூடு உண்டாக்கும் முறையில் இந்த ஆற்றலை அவர்களுக்கும் செலுத்திவிடு என்று சிவன் கட்டளை இட்டார்.

இந்தக் கட்டளையை ஏற்றுக் கொண்ட அக்னி, ஒரு குளத்தின் கரையில் நின்று கொண்டிருந்தார். அப்பொழுது சப்த ரிஷிகளின் மனைவிமார்கள் அனைவரும் குளிப்பதற்காக அந்தக் குளத்திற்கு வந்தனர். எல்லைமீறிய குளிரில் அவர்கள் உடல் நடுங்கிக் கொண்டிருந்தனர். அப்பொழுது அக்னி அங்கே கணகனவென்று எரியும் நெருப்பாக இருந்தான். ரிஷிபத்தினிகள் நெருப்பைக் கண்டதும் அதில் குளிர்காய விரும்பினர். அக்னியும் ஒரு தேவன் ஆகையால், வசிட்டன் மனைவியாகிய அருந்ததி மட்டும் அவன் பக்கத்தில் போவது தவறு என்று சொல்லி, எட்டி நின்றுவிட்டாள். ஆனால் மற்ற அறுவரும் அக்னியின் பக்கத்தில் சென்றனர். அவர்களுடைய உடம்பில் உள்ள சதை, தோல் என்பவற்றின் மூலமாக தன்னிடமிருந்த ஆற்றலை அவர்களுக்குள் செலுத்திவிட்டான். ரிஷிபத்தினிகள் வீடு திரும்பினர். நடந்ததைக் கேள்வியுற்ற அறுவரும் அவர்களை மனைவியாக ஏற்றுக் கொள்ள மறுத்து, நட்சத்திரங்களாகப் போகக்கடவீர் என்று சாபமிட்டனர்.