பிராமணனும், பூதமும்: முன்னொரு காலத்தில் விதிவர நகரத்தில், வேத்ரவதி நதிக்கரையில் ஒரு பூதம் படுத்திருந்தது. அங்கு வந்த பிராமணன் அப்பேயைப் பார்த்தான். கடுமையான வெயிலின் காரணமாக அப்பேயின் உடலில் கட்டிகள் நிறைய இருந்தன. அப்பேய் தாகம் மிகுதியால் நீர் வேண்டும் என்று அழுதுகொண்டிருந்தது. இதனைக் கண்ட பிராமணன் மனம் வருந்தி, “நீ ஏன் இவ்வாறு சித்திரவதைப்படுகிறாய்?" என்று கேட்டான். உடனே அப்பேய் தன் கதையைக் கூற ஆரம்பித்தது. என்னுடைய முன் ஜென்மத்தில் க்ஷீலபத்ரா என்ற பெயருடைய வைசியனாகப் பிறந்தேன். விதிஷா என்ற நகரில் வாழ்ந்து வந்தேன். மிகுந்த பொருள் வசதி கொண்ட நான், அவற்றினிடத்துப் பெரிதும் பற்று வைத்திருந்ததால், அவற்றை இழக்க மனம் வராமல் யாருக்கும் எந்த தான தர்மமும் செய்யாமல் இறந்தேன். என்னுடைய குடும்பத்தினரை மட்டும் நன்றாகப் பார்த்துக் கொண்டேன். என்னுடைய உறவினர்களையோ, நண்பர்களையோ நான் சிறிதும் மதிக்கவில்லை. இறைவனை வழிபடுவதையே மறந்து, எக்காலமும் என் செல்வத்தினைக் காப்பதிலேயே என் பொழுதினைக் கழித்தேன். அதனால் என்னுடைய மரணத்திற்குப் பிறகு நான் தண்டனை அனுபவிக்கிறேன். இந்தக் கடும் வெயிலில், இந்த மண் வெளியில் என் உடம்பை வருத்திக்கொள்ள வேண்டியுள்ளது. என்னால் இக் கொடுமையைத் தாங்க முடியவில்லை. தயவு செய்து எனக்கு உதவி செய்வாயாக’ என்று கேட்டது. உடனே பிராமணனும், "பத்து வருடங்களாகச் சுக்ர துவாதசி விரதம் இருந்து, நான் புண்ணியம் சேர்த்துள்ளேன். அதில் செலவழிந்தது போக, மீதமுள்ளதை உனக்கு உரிமை மாற்றிக் கொடுக்கிறேன். அதைக் கொண்டு நீ விடுதலை பெறுவாய்” என்று கூறி அவ்வாறே செய்திட, பூதமும் விடுதலை பெற்று சுவர்க்கத்தை அடைந்தது.

பவிஷ்ய புராணம் மேலும் சில விரதங்கள் பற்றிப் பேசுகிறது. புண்ணிய நதிகளாகிய கயை, புஷ்கரா, வாரணாசி, பிரயாகை ஆகியவற்றில் சென்று நீராடுவதில் ஏற்படும் புண்ணியத்தைக் காட்டிலும், உபய-துவாதசி விரதம் இருப்பதால் மிகுந்த புண்ணியம் கிடைக்கிறது.

திலகவிரதம் இருந்து, நெற்றியில் திலகமிட்டுக் கொண்டால் பகைவர்களும், தீய ஆவிகளும் ஒருவரை அணுகா. ஜதீஸ்மரா விரதம் என்பது ஒருவர் சந்திரன் உதயமாகும் வரை மெளனமாக இருப்பது. அவ்வாறு பேசாமல் இருக்கும் பொழுது எல்லா தெய்வங்களையும் ஒரே சமயத்தில் வணங்க வேண்டும். இவ்விரதத்தை மேற்கொள்பவருக்கு முன் ஜென்மத்து நினைவுகள் தோன்றப் பெறும்.

ஒருவர் புண்ணியம் பெறுவதற்காக, விரதங்களை அனுஷ்டிக்க வேண்டும் என்பதன்று. ஒரு விரதத்தைக் கடைப்பிடிக்க வேண்டிய வழிமுறைகள், விதிகள் ஆகிய வற்றைப் படிப்பதனாலும் புண்ணியம் கிடைக்கும். உதாரணமாக, ரசகல்யாணி விரதம் எடுப்போர், பார்வதி தேவியின் விக்கிரகத்திற்கு நெய் அபிஷேகம் செய்து வணங்க வேண்டும். இவ்விரதத்தை அனுஷ்டிக்கும் முறையினைப் படிப்பவர்கள், அன்றி இவ்விரதம் மேற்கொள்ளும்படி மற்றவர்களைத் தூண்டுபவர்கள், பார்வதியின் இருப்பிடம் அடைகின்றனர். அவர்களுடைய பாவங்கள் அனைத்தும் மன்னிக்கப்பெறும். அர்த்தநாரி விரதம், சிவன்-பார்வதியை வணங்குவதாகும். இவ்விரதம் பற்றிய விதிகளைப் படிப்பவர்கள், அல்லது மற்றவர்களை இவ்விரதம் மேற்கொள்ளுமாறு தூண்டுபவர்கள் இந்திரனின் இருப்பிடத்தை அடைவர்.

இவை அனைத்தும் விரதங்கள் மேற்கொள்ளுவதால் ஏற்படும் நன்மைகள். அசலன மனத்துடன் இறைவனை வழிபடுவது, விரதத்தினை முழுமையாக முடிக்காமல் அரை குறையாக நிறுத்துவது ஆகியவை தேவர்களின் கோபத்தை அதிகரிக்கும். அவ்வாறான தவற்றினைச் செய்தவர்கள், அகண்டதுவாதசி விரதம் இருந்து விஷ்ணுவின் மந்திரம் கூறி அவரது அருளைப் பெறவேண்டும். பெரும்பான்மையான விரதங்கள் பெண்களுக்கென்றே ஏற்பட்டிருக்கின்றன. உதாரணமாக, ஒர் அசுவமேதயாகம் செய்து கிடைக்கும் புண்ணியத்திற்கு நிகராக, ஆனந்த திரிதியை விரதம் இருந்து, பெண்களும் புண்ணியத்தை அடையலாம். இவ்விரதம் இருக்கும் பெண்கள், திருமணமானவர்கள் சிவப்பு ஆடையும், விதவைகள் மஞ்சள் ஆடையும், கன்னிப் பெண்கள் வெண்மையான உடையும் உடுத்த வேண்டும்.