தந்துஆயல் வேண்டாஓர் நாட்கேட்டுத் தாழாது வந்தால்நீ எய்துதல் வாயால்மற்று - எந்தாய் மறிமகர வார்குழையாள் வாழாள்நீ வாரல் எறிமகரம் கொட்கும் இரா.

46

சிலரைக் கொணர்ந்து ஆராயவேண்டுவதில்லை; நல்லதொரு நாட்கேட்டு நீட்டியாதே நீ வரைதற்கு வந்தால் இவளை எய்துதல் மெய்ம்மையால்: எம்மிறைவனே! எறிசுறாக்கள் கழியெங்குஞ் சுழலு மிராவின்கண் வாரல்; வரின், மறிமகர வார்குழையாள் உயிர் வாழாள்.

பண்ணாது பண்மேல்தே பாடும் கழிக்கானல் எண்ணாது கண்டார்க்கே ஏரணங்கால் - எண்ணாது சாவார்சான் றாண்மை சலித்திலா மற்றிவளைக் காவார் கயிறுரீஇ விட்டார்.

47

யாழினைப் பண்ணாது பண்மேற் சேரத் தேன்கள் பாடுங் கழிக்கானலின்கண் ஆராயாதே வந்து கண்டார்க்கே அழகிய தெய்வங்களாம்; ஆதலான், அறிவினா னாராயாது இறந்துபடுவார் சான்றாண்மையின் கண் வேறுபட்டிலா மற்றிவளைக் காவாது கயிறுரீஇ விட்டார்சான்றாண்மையின் வேறு பட்டார்.

திரை மேற்போந்து எஞ்சிய தெள்கழிக் கானல் விரைமேவும் பாக்கம் விளக்காக் - கரைமேல் விடுவாய் பசும்புற இப்பிகால் முத்தம் படுவாய் இருளகற்றும் பாத்து.

48

திரைமேற் போந்து கரைமே லொழிந்த விடு வாயையும் பசும்புறத்தையுமுடைய இப்பி கான்ற முத்தம், தெண்கழிக்கானலின் விரைமேவும் பாக்கம் ஒளியுண்டாம் வகைஇருள்படுமிட மெல்லாம் அவ்விருளைப் பகுத்தகற்றும்.

எங்கு வருதி இருங்கழித் தண்சேர்ப்ப!- பொங்கு திரையுதைப்பப் போந்தெழிந்த - சங்கு நரன்யியிர்த்த நித்திலம் நள்ளிருள்கால் சீக்கும் வரன்றுயிர்த்த பாக்கத்து வந்து.

49

எவ்விடத்தானே வருவாய் இருங்கழித் தண் சேர்ப்பனே! பொங்கு திரைகளானே யுதைக்கப்பட்டுப் போந்து கரையின்கட்டங்கிய சங்குகள் கதறிப் பொறையுயிர்த்த முத்தங்கள் செறிந்த இருளை இடங்களினின்றுஞ் சீயாநிற்கும்; திரைகொணர்ந்து போதவிட்டனவற்றைக் கண்டார் வரன்றாநின்றபாக்கத்தின்கண்.

திமில்களி றாகத் திரைபறையாப் பல்புள் துயில்கெடத் தோன்றும் படையாத் - துயில்போல் குறியா வரவொழிந்து கோலநீர்ச் சேர்ப்ப! நெறியால்நீ கொள்வது நேர்.

50

திமிலே களிறாகத் திரையே பறையாகத் துயில் கெடத்தோன்றும் படை புட்களாக, கனாக் கண்டாற்போலத் தேறமுடியாத களவின்கட் டனியே வரும் வரவினை யொழிந்து, கோலநீர்ச் சேர்ப்பனே! நெறியானே வரைந்து இவளைக் கொள்வது நினக்குத் தகுதி.