இத்தலம் சோழநாட்டிலுள்ளது.

சுவாமிபெயர் - கோடீசுவரர்.
தேவியார் - வடிவாம்பிகையம்மை.

488

நெற்றிமேற் கண்ணி னானே நீறுமெய் பூசி னானே கற்றைப்புன் சடையி னானே கடல்விடம் பருகி னானே செற்றவர் புரங்கண் மூன்றுஞ் செவ்வழல் செலுத்தி னானே குற்றமில் குணத்தி னானே கோடிகா வுடைய கோவே.

4.051.1

கோடிகா உடைய பெருமான் நெற்றிக்கண்ணனாய், நீற்றைத் திருமேனியிற் பூசியவனாய், முறுகிக் கற்றையான சிவந்த சடையினனாய், கடலில் தோன்றிய நஞ்சினைப்பருகியவனாய், பகைவருடைய முப்புரங்களிலும் தீயைச் செலுத்தியவனாய், குற்றமற்ற நற்பண்பினாய் உள்ளவனாவான்.

489

கடிகமழ் கொன்றை யானே கபாலங்கை யேந்தி னானே வடிவுடை மங்கை தன்னை மார்பிலோர் பாகத் தானே அடியிணை பரவ நாளு மடியவர்க் கருள் செய்வானே கொடியணி விழவ தோவாக் கோடிகா வுடைய கோவே.

4.051.2

கொடிகள் ஏற்றப்பட்டுத் திருவிழாக்கள் நடத்தப் பெறுதல் நீங்காத கோடிகாப் பெருமான் நறுமணம் கமழும் கொன்றைப் பூவினனாய், கையில் ஏந்திய மண்டையோட்டை உடையவனாய், அழகிய பார்வதியைப் பாகமாக மார்பில் கொண்டவனாய்த் தன் திருவடிகளை வழிபடுமாறு நாள்தோறும் அடியவர்களுக்கு அருள் செய்பவனாவான்.

490

நீறுமெய் பூசி னானே நிழறிகழ் மழுவி னானே ஏறுகந் தேறி னானே யிருங்கட லமுதொப் பானே ஆறுமோர் நான்கு வேத மறமுரைத் தருளி னானே கூறுமோர் பெண்ணி னானே கோடிகா வுடைய கோவே.

4.051.3

கோடிகாப் பெருமான் நீற்றைத் திருமேனியில் பூசியவனாய், ஒளிவீசும் மழுப்படையினனாய், காளையை விரும்பி ஏறிஊர்ந்தவனாய், பெரிய கடலில் தோன்றிய அமுதத்தை ஒப்பவனாய், நான்கு வேதங்களும் ஆறு அங்கங்களும் ஆகிய அறத்தை உபதேசித்தவனாய், பார்வதி பாகனாய் உள்ளான்.

491

காலனைக் காலாற் செற்றன் றருள்புரி கருணை யானே நீலமார் கண்டத் தானே நீண்முடி யமரர் கோவே ஞாலமாம் பெருமை யானே நளிரிளந் திங்கள் சூடும் கோலமார் சடையினானே கோடிகா வுடைய கோவே.

4.051.4

கோடிகா உடைய பெருமான் காலனைக் காலால் ஒறுத்து மார்க்கண்டேயனுக்கு அருள்புரிந்த கருணையாளனாய், நீல கண்டனாய், நீண்டமுடிகளை உடைய தேவர்களுக்குத் தலைவனாய் உலகம் முழுதும் பரவிய பெருமானாய், குளிர்ந்த பிறைசூடும் அழகிய சடையினை உடையவனாய் உள்ளான்.

492

பூணர வாரத் தானே புலியுரி யரையி னானே காணில்வெண் கோவ ணம்முங் கையிலோர் கபால மேந்தி ஊணுமோர் பிச்சை யானே யுமையொரு பாகத் தானே கோணல்வெண் பிறையி னானே கோடிகா வுடைய கோவே.

4.051.5

கோடிகா உடைய தலைவன் பாம்பை மாலையாகப் பூண்டு புலித்தோலை இடையில் உடுத்து வெண்கோவணம் தரித்து, கையில் மண்டையோட்டை ஏந்தி. பிச்சை ஏற்ற உணவையே உண்பவனாய்ப் பார்வதிபாகனாய் வளைந்த வெள்ளிய பிறையைச் சூடியவனாய் உள்ளான்.

493

கேழல்வெண் கொம்பு பூண்ட கிளரொளி மார்பி னானே ஏழையே னேழை யேனா னென்செய்கே னெந்தை பெம்மான் மாழையொண் கண்ணி னார்கள் வலைதனின் மயங்கு கின்றேன் கூழையே றுடைய செல்வா கோடிகா வுடைய கோவே.

4.051.6

கோடிகா உடைய பெருமானே! பன்றியின் வெண்ணிறக் கொம்பினை அணிந்த ஒளிவீசும் மார்பினனாய், குட்டையான காளையை உடைய செல்வனே! எம் தந்தையாகிய தலைவனே!அழகிய ஒளி பொருந்திய கண்களை உடைய மகளிரின் பார்வையாகிய வலையில் அகப்பட்டு மயங்குகின்றேன். அறிவிலியாகிய அடியேன் யாது செய்குவென்?

494

அழலுமி ழங்கை யானே யரிவையோர் பாகத் தானே தழலுமி ழரவ மார்த்துத் தலைதனில் பலிகொள் வானே நிழலுமிழ் சோலை சூழ நீள்வரி வண்டி னங்கள் குழலுமிழ் கீதம் பாடுங் கோடிகா வுடைய கோவே.

4.051.7

நெருப்பை ஏந்திய உள்ளங்கையை உடையவனே! பார்வதிபாகனே! நெருப்பைக் கக்குகின்ற பாம்பினைக் கட்டிக் கொண்டு மண்டையோட்டில் பிச்சை பெறுபவனே! நிழலை வெளிப்படுத்துகின்ற சோலைகள் சூழ்ந்திருக்க அவற்றில் நீண்டகோடுகளை உடைய வண்டினங்கள் வேய்ங்குழல் ஒலிபோன்ற பாடல்களைப் பாடும் கோடிகாவை உடைய பெருமானே!

495

ஏவடு சிலையி னானே புரமவை யெரிசெய் தானே மாவடு வகிர்கொள் கண்ணாண் மலைமகள் பாகத் தானே ஆவடு துறையு ளானே யைவரா லாட்டப் பட்டேன் கோவடு குற்றந் தீராய் கோடிகா வுடைய கோவே.

4.051.8

அம்பை இணைத்த வில்லைக் கொண்டு மும்மதில்களையும் தீக்கு இரையாக்கியவனே! மாவடுவின் பிளப்பைப் போன்ற கண்களை உடைய பார்வதிபாகனே! ஆவடுதுறையில் உறைபவனே! கோடிகா உடைய தலைவனே! ஐம்பொறிகளாலும் யான் அவை விரும்பியவாறு செயற்படுத்தப்பட்டுள்ளேன். பசுக்கொலைக்கு ஒப்பாகிய என் குற்றங்களைப் போக்குவாயாக.

496

ஏற்றநீர்க் கங்கை யானே யிருநிலந் தாவி னானும் நாற்றமா மலர்மே லேறு நான்முக னிவர்கள் கூடி ஆற்றலா லளக்க லுற்றார்க் கழலுரு வாயி னானே கூற்றுக்குங் கூற்ற தானாய் கோடிகா வுடைய கோவே.

4.051.9

கோடிகாவில் உள்ள பெருமானே! கங்கையைச் சடையில் ஏற்றவனே! பெரிய உலகங்களை ஈரடியால் அளந்த திருமாலும் நறுமணம கமழும் தாமரை மலர்மேல் தங்கும் பிரமனும் ஆகியஇருவரும் கூடித் தம் ஆற்றலால் அளக்க முயன்றவர்களுக்குத் தீத்தம்ப வடிவாயினவனே! யமனுக்கும் யமனாயினாய் நீ.

497

பழகநா னடிமை செய்வேன் பசுபதீ பாவ நாசா மழகளி யானையின் றோன் மலைமகள் வெருவப் போர்த்த அழகனே யரக்கன் றிண்டோ ளருவரை நெரிய வூன்றும் குழகனே கோல மார்பா கோடிகா வுடைய கோவே.

4.051.10

கோடிகா உடையகோவே! ஆன்மாக்களின் தலைவனே! பாவங்களைப்போக்குபவனே! இளைய மதமயக்கமுடைய யானையின் தோலைப் பார்வதி அஞ்சுமாறு போர்த்த அழகனே! அரக்கனாகிய இராவணனுடைய வலிய தோள்கள் கயிலை மலையின் கீழ் அகப்பட்டு நெரியுமாறு கால்விரலை அழுத்திய அழகனே! நின் தொண்டிற் பழகுமாறு நான் அடித்தொண்டு செய்வேன்.