மை அற விளங்கிய மணி நிற விசும்பில் கைதொழும் மரபின் எழு மீன் போல, பெருங் கடற் பரப்பின் இரும் புறம் தோய, சிறு வெண் காக்கை பலவுடன் ஆடும் துறை புலம்பு உடைத்தே- தோழி!- பண்டும்,	5
உள் ஊர்க் குரீஇக் கரு உடைத்தன்ன, பெரும் போது அவிழ்ந்த கருந் தாட் புன்னைக் கானல்அம் கொண்கன் தந்த காதல் நம்மொடு நீங்காமாறே.

தோழீ! இதன் முன்னும் மனையின் கண்ணேயுள்ள ஊர்க்குருவியின் முட்டையை உடைத்தாற்போன்ற பெரிய அரும்பு மலர்ந்த கரிய அடியையுடைய புன்னையஞ் சோலையையுடைய கொண்கன்; கொடுத்த காதலானது நம்மை விட்டு நீங்காமையினாலே : மை அற விளங்கிய மணிநிற விசும்பின் கை தொழு மரபின் எழு மீன்போல மாசு அற விளங்கிய நீலமணிபோன்ற நிறத்தையுடைய ஆகாயத்தின்கண்ணே தோன்றி உலகத்தாராலே கைதொழப்படுந் தகுதியையுடைய முனிவரின் தோற்றமாகிய ஏழுமீன்களைப் போல; பெரிய கடற் பரப்பின்கண்ணே கரியமுதுகு நனையும்படி சிறிய வெளிய நீர்க்காக்கை பலவும் ஒருசேர நீர் குடையாநிற்கும் கடல் துறையை; யாம் தமியேமாய் நோக்குதற்கு அத் துறை நனி இன்னாமை உடையதாகக் காணுந் தன்மையதாயிராநின்றது;

சிறைப்புறமாகத் தோழி சொல்லி, வரைவு கடாயது. - இளநாகனார்