காமங் காமம் என்ப காமம் அணங்கும் பிணியும் அன்றே நுணங்கிக் கடுத்தலுந் தணிதலும் இன்றே யானை குளகுமென் றாள்மதம் போலப் பாணியும் உடைத்தது காணுநர்ப் பெறினே.	5
- மிளைப்பெருங் கந்தனார்.

காமம் காமம் என்று உலகினர் அதனைக் குறை கூறுவர்; அக்காமமானது புதியதாகத் தோற்றும் வருத்தமும் நோயும் அன்று; நுண்ணிதாகி மிகுதலும் குறைதலும் இலது; யானை! தழை யுணவை மென்று தின்று அதனாற் கொண்ட மதத்தைப் போல கண்டு மகிழ்வாரைப் பெற்றால் அக்காமம் வெளிப்படும் செவ்வியையும் உடையது.

முடிபு: காமம் காமம் என்ப; காமம் அணங்கும் பிணியும் அன்று; கடுத்தலும் தணிதலும் இன்று; அது காணுநர்ப் பெறின் பாணியும் உடைத்து.    

கருத்து: காமம் இயல்பாகவே ஒருவரிடம் இருந்து உரிய காலத்தில் வெளிப்படுவது.