தேவையானவை: பச்சரிசி - அரை கப், பச்சைப் பட்டாணி - கால் கப், உருளைக்கிழங்கு - 1, கத்திரிக்காய் - 1, பெரிய வெங்காயம் - 1, பொடியாக நறுக்கிய மல்லித்தழை - 2 டேபிள்ஸ்பூன், மஞ்சள்தூள் - கால் டீஸ்பூன், உப்பு - ருசிக்கேற்ப, தனியா தூள், சீரகத்தூள், மிளகாய்தூள் - தலா 2 டீஸ்பூன், கரம் மசாலாதூள் - முக்கால் டீஸ்பூன், எண்ணெய் அல்லது நெய் - ஒன்றரை டேபிள்ஸ்பூன். அரைப்பதற்கு: தேங்காய் துருவல் - 2 டேபிள்ஸ்பூன், பச்சை மிளகாய் - 2, இஞ்சி - ஒரு துண்டு, பூண்டு - 5 அல்லது 6 பல்.

செய்முறை: அரிசியைக் கழுவிவைக்கவும். அரைக்கக் கொடுத்துள்ள பொருட்களை விழுதாக அரைத்துக்கொள்ளவும். கத்திரிக்காயையும் உருளைக்கிழங்கையும் சற்று பெரிய துண்டுகளாக நறுக்கவும். மைக்ரோ பாத்திரத்தில் நெய்யை ஊற்றி, அதில் வெங்காயத்தைப் போட்டு லேசாக வதக்கவும். பிறகு, கத்திரிக்காய், உருளைக்கிழங்கு துண்டுகளையும் சேர்த்து வதக்கி, அரைத்த விழுது, கரம் மசாலா, மஞ்சள்தூள், தனியா தூள், சீரகத்தூள், அரிசி ஆகியவற்றையும் சேர்க்கவும். அதில் ஒன்றரை கப் நீர் விட்டு, உப்பு போட்டு மூடி, 17 முதல் 18 நிமிடங்கள் ‘மைக்ரோ ஹை’யில் வைக்கவும். 5 நிமிடங்களுக்கு ஒருமுறை, வெளியே எடுத்து, கலவையைக் கிளறிவிடவும். நன்கு பொலபொலவென வந்ததும், மல்லித்தழை தூவி, சுடச் சுடப் பரிமாறவும். சுவை அள்ளிக்கொண்டு போகும்.