இந்திய தேசிய இயக்கம் (1917 - 1947)
அரசுக்கு எதிரான சதி வேலைகளை ஆய்வு செய்வதற்காக சர் சிட்னி ரௌலட் என்பவரது தலைமையில் 1917ல் ஒரு குழு நியமிக்கப்பட்டது. அக்குழுவின் அறிக்கைப்படி 1919 மார்ச் திங்களில் ரௌலட் சட்டம் மத்திய சட்டசபையில் கொண்டு வரப்பட்டது. இச்சட்டப்படி சந்தேகத்தின் பேரில் எவரையும் கைது செய்யலாம். இத்தகைய கைதுகளை எதிர்த்து விண்ணப்பமோ அல்லது மேல்முறையிடோ செய்ய முடியாது. இச்சட்டம் கருப்புச் சட்டம் என்று கருதப்பட்டது. இச்சட்டத்திற்கு பலத்த எதிர்ப்புகள் தோன்றின.
1919 ஏப்ரல் 6 ஆம் நாள் இந்தியா முழுவதிலும் (ஹர்த்தால்) மறியல் போராட்டங்கள் நடத்தப்பட்டன. நாடு முழுவதும் பொதுக் கூட்டங்கள் நடைபெற்றன. டெல்லிக்கு அருகில் மகாத்மா காந்தி கைது செய்யப்பட்டார். பஞ்சாபின் முக்கிய தலைவர்களான டாக்டர் சத்யபால் மற்றும் டாக்டர் சைபுதீன் கிச்லு இருவரும் அமிர்தசரஸில் கைது செய்யப்பட்டனர்.
ஜாலியன் வாலாபாக் படுகொலை |
1919 ஏப்ரல் 13 ஆம் நாள் நடைபெற்ற ஜாலியன் வாலாபாக் படுகொலை இந்திய விடுதலை இயக்கத்தில் ஒரு முக்கிய திருப்பு முனையாகும். ரௌலட் சத்யாக் கிரகப் போராட்டத்திற்கு பஞ்சாபில் பெருத்த ஆதரவு திரண்டது. வன்முறையை எதிர் நோக்கிய பஞ்சாப் அரசாங்கம் ஆட்சிப் பொறுப்பை ஜெனரல் டையர் தலைமையிலான ராணுவத்திடம் ஒப்படைத்தது. அவர் பொதுக் கூட்டங்களுக்கு தடை விதித்து அரசியல் தலைவர்களை கைது செய்தார். ஏப்ரல் 13 ஆம் நாள் பைசாகி என்ற அறுவடைத் திருநாளன்று ஜாலியன் வாலா பாக் பூங்காவில் ஒரு பொதுக் கூட்டம் ஏற்பாடு செய்யப்பட்டது. டையர் தனது படையுடன் அங்கு சென்று எவ்வித முன்னறிவிப்புமின்றி கூட்டத்தின்மீது துப்பாக்கிச்சூடு நடத்தினார். துப்பாக்கிச்சூடு 10 முதல் 15 நிமிடங்கள் நீடித்தது. துப்பாக்கி தோட்டாக்கள் தீர்ந்த பிறகுதான் அது நிறுத்தப்பட்டது. அதிகாரப்பூர்வ தகவலின்படி 379 பேர் கொல்லப்பட்டனர்; 1137 பேர் படுகாயமடைந்தனர். இந்த படுகொலையை எதிர்த்து நாடு முழுவதும் போராட்டங்கள் நடைபெற்றன. ரவிந்திரநாத்தாகூர் தமது 'நைட்' பட்டத்தை துறந்தார். ஜாலியன் வாலாபாக் படுகொலை விடுதலை இயக்கத்திற்கு பெரும் உத்வேகத்தை கொடுத்தது.
‹‹ முன்புறம் | 1 | 2 | 3 | 4 | 5 | 6 | 7 | ... | 12 | 13 | தொடர்ச்சி ›› |
தேடல் தொடர்பான தகவல்கள்:
இந்திய தேசிய இயக்கம் (1917 - 1947) , இந்திய, வரலாறு, ஜாலியன், ஏப்ரல், படுகொலை, வாலாபாக், கைது, ரௌலட், தேசிய, பொதுக், இயக்கம், நாள், இந்தியா, சட்டம், விடுதலை, பேர், துப்பாக்கிச்சூடு, டையர், நாடு, போராட்டங்கள், எதிர்த்து, முழுவதும், நடைபெற்றன, முக்கிய, டாக்டர்