கலகம் போன்ற குழப்பங்களின்போது துருப்புகளை அனுப்புவதற்கு ரயில் பாதைகள் பெரிதும் பயன்பட்டது. ரயில்பாதை வளர்ச்சிக்கு டல்ஹவுசியின் பங்களிப்பு போற்றத்தக்கதாகும். 1853ல் அவர் 'ரயில்வே அறிக்கை' ஒன்றை தாமே தயாரித்தார். இந்தியாவின் எதிர்கால ரயில்பாதை கொள்கையை இது வடிவமைத்தது. "உத்திரவாத முறை" யின் கீழ் அவர் ரயில்பாதை அமைக்கும் பணிகளை தொடங்கி வைத்தார். இதன்படி ரயில்பாதைகளில் முதலீடு செய்தவர்களுக்கு குறைந்தபட்சம் 54 சதவீத வட்டி உறுதியளிக்கப்பட்டது. ஒப்பந்த காலம் முடிந்தவுடன் ரயில்பாதைகளை திரும்ப வாங்கிக் கொள்ளும் உரிமையை அரசு தக்க வைத்துக் கொண்டது. பம்பாயிலிருந்து தாணே வரை செல்லும் முதல் ரயில்பாதை 1853ல் தொடங்கப்பட்டது. கல்கத்தாவையும் ராணிகஞ்ச் நிலக்கரி சுரங்கத்தையும் இணைக்கும் ரயில்பாதை 1854 ஆம் ஆண்டிலும் மற்றும் சென்னை அரக்கோணம் இடையிலான ரயில்பாதை 1856 ஆம் ஆண்டிலும் தொடங்கப்பட்டன.

[உலகின் முதல் ரயில்பாதை 1825 ஆம் ஆண்டு இங்கிலாந்தில் தொடங்கப்பட்டது.]

தந்தி

அதேபோல், தந்தியின் பயன்பாட்டினால் தகவல் தொடர்பில் பெரும் மாற்றங்கள் ஏற்பட்டன. இந்தியாவில் டல்ஹவுசி இதற்காக மேற்கொண்ட பணிகள் சிறப்பானவையாகும். 1852 ஆம் ஆண்டு ஓ ஷாகன்னசே என்பவர் தந்தித் துறையின் முக்கிய கண்காணிப்பாளராக நியமிக்கப்பட்டார். நாட்டின் முக்கிய நகரங்களான கல்கத்தா, பெஷாவர், பம்பாய், சென்னை போன்றவை தந்தி மூலம் இணைக்கப்பட்டன. டல்ஹவுசி தாயகம் திரும்புமுன் சுமார் 4000 மைல்கள் நீளத்திற்கு தந்திக்கம்பிகள் நிறுவப்பட்டன. 1857 ஆம் ஆண்டு கலகத்தின்போது தந்திமுறை ஆங்கிலேயருக்கு பெரும் வரப்பிரசாதமாக அமைந்தது. அதன் ராணுவ மதிப்பு அப்போதுதான் பெரிதும் உணரப்பட்டது.

அஞ்சல் துறை

தற்கால அஞ்சல் துறைக்கு அடித்தளம் அமைத்தவர் டல்ஹவுசி பிரபு ஆவார். 1854ல் ஒரு புதிய அஞ்சலகச் சட்டம் நிறைவேற்றப்பட்டது. இதனால் தூரத்தைக் கணக்கில் எடுக்காமல் இந்தியா முழுவதும் செல்லக்கூடிய ஒரே மாதிரியாக அரை அணா அஞ்சல் அட்டை அறிமுகப்படுத்தப்பட்டது. அஞ்சல் தலைகளும் முதன்முறையாக அறிமுகம் செய்யப்பட்டன.

---